Эстония бош вазири ва ҳукмрон “Ислоҳотлар” партияси раҳбари Кристен Михал мамлакатда яшовчи Россия фуқароларини муниципал сайловларда фаол овоз бериш ҳуқуқидан маҳрум қилишга чақирди.
Унинг қайд этишича, ҳукмрон “Ислоҳотлар” партияси бу қарорини қонунга ёки конституцияга ўзгартиришлар киритиш орқали расмийлаштиришга тайёр.
“Биз узоқ вақт давомида ўз позициямиз ҳақида жуда аниқ гапирдик. Биринчидан, биз ўзгаришларни хоҳлаймиз — Россия ва Беларусь фуқаролари бу ердаги маҳаллий сайловларда муаммоларни ҳал қилмаслиги керак. Уларнинг овоз бериш ҳуқуқлари тўхтатилиши ёки олиб қўйилиши керак. Бу қанчалик тез ва ҳуқуқий жиҳатдан аниқ амалга оширилса, шунча яхши”, деди Эстония бош вазири.
Михалнинг таъкидлашича, “Ислоҳотлар” партияси парламент билан биргаликда мумкин бўлган вариантларни таҳлил қилади, чунки депутатларнинг аксарияти партия позицияси билан ҳамфикр.
21 октябрь куни “Исамаа” фракцияси раҳбари Ҳелир-Валдор Сеедер конституцияга учинчи давлат фуқаролари ва фуқаролиги аниқланмаган шахсларнинг муниципал сайловларда сайлов ҳуқуқидан маҳрум этилишига рухсат берувчи ўзгартиришлар киритиш тўғрисидаги қонун лойиҳасини парламентга тақдим этди. Ташаббус маҳаллий сайловларда овоз бериш ҳуқуқини фақат Эстония ва махсус халқаро шартномалар тузилган давлатлар фуқароларига қолдиришини назарда тутади.
Эстонияда навбатдаги муниципал сайловлар 2025 йил 19 октябрда бўлиб ўтади.
Изоҳ (0)