Жосеп Боррелнинг айтишича, у Европа дипломатияси раҳбари бўлган даврда Европа иттифоқи (ЕИ) “фақат тижорий эмас, балки геосиёсий ўйинчига айланиш” учун муҳим қадамлар қўйган. У Россияга қарши 14 та санкциялар тўплами жорий этилганини ўзининг ютуқлари қаторига киритишини маълум қилди.
“Биз Путиннинг жанговар машинасини жазолаш учун 14 та санкция пакетини маъқулладик ва у уруш қилаётган мамлакатга ҳарбий ёрдам кўрсатдик... Инқирозли вазиятларга таъсир кўрсатиш имкониятимизни ишга солиб, Европа қўмондонлиги остида 5000 аскарни тезкор жойлаштириш масаласини маъқулладик”, дея ўз ютуқларини санаб ўтди у Испаниянинг 20 minutos газетасига берган интервьюсида.
Европа иттифоқи июнь ойида Россияга қарши санкцияларнинг 14-пакетини қабул қилганди.
Шунингдек, Жосеп Боррель сентябрь ойида Россияни қўллаб-қувватлаётгани учун Эронга қарши янги санкциялар жорий этишга ваъда берганди.
Декабрдан бошлаб Жосеп Боррель ўрнини Эстония собиқ бош вазири Кая Каллас эгаллайди. Унинг номзоди ёз бошида Европа иттифоқи саммитида тасдиқланган. Еврокомиссия раҳбари Урсула фон дер Ляйен иккинчи муддатга, Португалиянинг собиқ бош вазири Антонио Косто эса Шарль Мишель ўрнига Европа кенгаши президенти этиб сайланди.
Кая Каллас ўз чиқишида НАТО Украинанинг урушдаги ғалабасини асосий мақсади сифатида белгилаши кераклигини айтганди.
Изоҳ (0)