Латвия ҳукумати 16 июлдан бошлаб Беларусда рўйхатдан ўтган автомобилларни мамлакатга киритишни тўхтатади. Бу ҳақда Латвия Давлат даромад хизматига таяниб, Delfi хабар берди.
Хабарга кўра, Беларусь давлат рақамларига эга автомобилларнинг Беларусь-Латвия чегарасига ҳам, Латвия ва Россия ўртасидаги чегара ўтиш жойларига ҳам кириши тақиқланади. Дипломатик ва консуллик ваколатхоналари транспорт воситалари бундан мустасно.
Латвия чегарасини кесиб ўтмоқчи бўлган Беларусь давлат рақамларига эга автомобиль эгалари божхоначиларнинг талабларини бажаришдан бош торца, транспорт воситасини мусодара қилиш тўғрисида қарор қабул қилиниши мумкин, дея таъкидлаган солиқ хизмати.
Қарор Европа Иттифоқининг Беларусга қарши янги санкциялар пакетига мувофиқ киритилмоқда. Маълум бўлишича, Латвия Адлия вазирлиги ҳам Беларусда рўйхатдан ўтган транспорт воситаларининг мамлакатда бўлишини, жумладан, транзит орқали чегарани кесиб ўтишни тақиқловчи қонун лойиҳасини ишлаб чиқмоқда. Беларусь давлат рақамларига эга бўлган автомобиллар Латвияда қайта рўйхатдан ўтказилиши керак. Қоидабузарларнинг машиналари мусодара қилинади ва Украина фойдасига ўтказилади.
Шунга ўхшаш талаблар аллақачон Латвияда Россия рақамларига эга автомобиллар учун амал қилади. Россия автомобиллари транзит мамлакат орқали фақат бир марта ўтиши мумкин. Шунингдек, Литва, Эстония, Финляндия ва Польша ҳудудига Россия давлат рақамларига эга автомобилларни киритиш тақиқланган.
Изоҳ (0)