НАТО Эстония қуролли кучларига альянс ва Москва ўртасида юзага келиши мумкин бўлган қуролли можарога тайёргарлик кўриш вазифасини юклади. Бу ҳақда Болтиқбўйи республикаси мудофаа кучлари бош штаби бошлиғи Ваҳур Карус маълум қилди.
“Бугунги кунда бизнинг узоқ масофали зарба бериш қобилиятларимиз НАТО режаларида тўлиқ ҳисобга олинган”, деди генерал майор Карус.
Унинг тушунтиришича, Украинада жанговар ҳаракатлар бошланишидан олдин Эстония армияси альянснинг асосий кучлари ўз ҳудудига ўтказилгунга қадар бор-йўғи 10 кун дош бера олиши кутилган эди. Эстониялик генерал НАТОнинг янги кўрсатмаларини мамлакат ҳарбий доктринаси учун “фундаментал ўзгариш” деб атаган.
Каруснинг сўзларига кўра, ўн йил олдинги вазиятдан фарқли ўлароқ, Эстония, албатта, Россия билан можарода ўз ҳудудида жойлашган иттифоқчи бўлинмаларнинг зудлик билан иштирок этишига ишониши мумкин.
“Бугунги вазият шундан иборатки, бизда мавжуд бўлган барча иттифоқчи қўшинлар бизнинг ҳарбий режаларимизга киритилган. Биз можаро юзага келганда улар ўзлари билан қандай қуроллар олиб келиши ва уларнинг вазифалари қандай бўлишини биламиз”, дея хулоса қилган у.
Аввалроқ Россия ТИВ матбуот котиби Мария Захарова Ғарб ҳарбий блоки Россия билан эҳтимолий қуролли тўқнашувга анчадан бери тайёргарлик кўраётганини айтган эди. Унинг сўзларига кўра, НАТО давлатлари ўз фаолиятини “Россия таҳдидини қайтариш”га тайёрланиш зарурати билан рағбатлантирмоқда. Захарованинг таъкидлашича, ҳарбий бюджетлар кўпайтирилмоқда, ташкилотга аъзо мамлакатлар иқтисодиёти тўлиқ ҳарбийлаштирилмоқда. У Россиянинг НАТОга нисбатан тажовузкор режалари бўлмаган ва ҳозирда ҳам мавжуд эмаслигини қўшимча қилган.
Изоҳ (0)