Евроиттифоқда озиқ-овқат маҳсулотлари, шу жумладан, нон сўнгги бир йил ичида қимматлашиб кетди, деб хабар бермоқда ЕИ статистика хизмати — Евростат.
«Нон, сабзавотлар, гўшт — егуликлар қимматлашди. Ошпазлик мойлари ва ёғлари нархлари айниқса кескин ошди, бироқ нон каби асосий озиқ-овқат маҳсулотлари ҳам сезиларли даражада қимматлашди», — дейилади Евростат сайтида эълон қилинган хабарда.
Таъкидланишича, 2022 йил августида Евроиттифоқда нон нархи 2021 йил августига нисбатан ўртача 18 фоизга ошган. «Бу 2021 йил августи билан таққослаганда жуда катта ўсиш, ўшанда нон нархи 2020 йил августига қараганда ўртача 3 фоизга ошганди», — деб маълум қилади статистика хизмати.
Шу билан бирга, Евростат хабарига кўра, баъзи Европа мамлакатларида озиқ-овқат нархлари бошқаларига нисбатан кўпроқ ўсиши кузатилмоқда. Нон нархи ўсиши бўйича энг юқори кўрсаткичлар Венгрияда (2022 йил августида +66%), Литвада (+33%), Эстония ва Словакияда (иккаласида ҳам +32%) қайд этилди.
Экспертлар айтишича, бу қисман Россиянинг Украинага ҳарбий ҳужуми билан боғлиқ. Россия ва Украина дон, буғдой, маккажўхори, ёғли ўсимликлар (айниқса кунгабоқар) уруғи ва ўғит бўйича йирик экспортчилар бўлгани сабабли, уруш дунё бозорига жиддий таъсир ўтказган.
Изоҳ (0)