Эстония, Литва, Латвия ва Польша 19 сентябрдан россияликларнинг ўз ҳудудларига киришини тақиқлади, бу учинчи давлатлар томонидан берилган Шенген визаси бўлган россияликларга ҳам тегишлидир, деб ёзади «РБК».
«Латвия, Литва ва Польша билан биргаликда биз жамоат тартиби ва хавфсизлигини ҳимоя қилиш мақсадида Россия фуқаролари учун туризмга нисбатан умумий чекловларни киритишга қарор қилдик, — деди Эстония бош вазири Кая Каллас. — Евроиттифоқнинг чегара яқинидаги давлатлари сифатида, биз Европа хавфсизлигини таъминлашимиз керак».
Унинг сўзларига кўра, Европа Иттифоқига сафар қилиш — инсоннинг ҳуқуқи эмас, балки имтиёздир. «Айни пайтда Евроиттифоққа Эстония орқали кириб келаётган Россия фуқаролари хавфсизликка таҳдид яратмаслигини кафолатлаш имкони йўқ. Минтақавий келишувга эришилди ва энди биз бутун Европа Иттифоқида Россия фуқаролари учун сайёҳлик чекловлари устида ишлашда давом этамиз», — дея таъкидлади Каллас.
19 сентябрь, душанба куни 00:00 дан кучга кирган чекловларга мувофиқ, саёҳат қилиш мақсадидаги россияликлар тўртта Европа мамлакатига киритилмаяпти. Шу билан бирга таъкидланишича, тақиқ барча фуқаролар учун ҳам амал қилмайди.
Польша ва Болтиқ мамлакатлари россиялик сайёҳлар учун Евроиттифоққа киришни тўлиқ тақиқлашни ёқлаб чиқди, аммо бу қарор бошқа мамлакатлар томонидан қўллаб-қувватланмади. Бунинг ўрнига, Евроиттифоқ Россия билан соддалаштирилган тартибда визалар бериш ҳақидаги келишувни тўхтатиб қўйишга қарор қилди.
Шенген битими унинг таркибига кирувчи давлатларнинг бутун ҳудуди бўйлаб эркин кўчиб юришни кафолатлайди. Айни вақтда Евроиттифоқнинг ташқи чегаралари орқали кириш масалаларини ҳар бир мамлакат мустақил назорат қилади.
Россия билан чегарадош бўлган Финляндия ўз ҳудудига киришни тақиқлаш ғоясига қўшилмади. Мамлакат ҳукумати бундай қарорлар Евроиттифоқ даражасида қабул қилиниши керак, деган фикрни билдирди. Шу билан бирга, Финляндия берилаётган визалар сонини сезиларли даражада қисқартирди.
Аввалроқ Латвия, Литва ва Эстония Шенген визасига эга Россия ва Беларусь фуқаролари учун қуруқлик чегараларини кесиб ўтишни сезиларли даражада чеклашга келишиб олган эди.
Шунингдек, россияликларнинг Грузия ҳудудига кириши оммавий равишда тақиқлана бошлади.
Мавзуга доир:
Изоҳ (0)