Литва ташқи ишлар вазири ЕИ давлатларини Россия элчиларини ҳудудидан чиқариб юборишга чақирди
Литва Ташқи ишлар вазирлиги раҳбари Габриэлюс Ландсбергис Россия элчиларининг Европа Иттифоқи мамлакатларида қолишини беъманилик, деб ҳисоблашини айтди.
“Европанинг бирорта пойтахтида элчи, Россия элчисининг бўлиши мантиққа тўғри келмайди. Аксарият ҳолларда, бу энди дипломатик муассаса эмас, балки уруш жиноятларини яширадиган ва умуман геноцид дастурини тарғиб қилувчи пропаганда муассасаси бўлиб хизмат қилмоқда”, — дея Ландсбергиснинг сўзларидан иқтибос келтирди Delfi нашри.
Вазир Литва 2022 йилнинг баҳорида Бучада тинч аҳолининг ўлдирилишига жавобан Россия элчисини чиқариб юборгани, январда эса Эстония ва Латвия Россия элчиларини чиқариб юборишини эълон қилгани ҳақида эслатди.
“Украинада бўлаётган воқеаларни кўрган бошқа давлатлар ҳам бу тўғри йўл эканига ишонч ҳосил қилишига шубҳа қилмайман”, — деди Ландсбергис. Шу билан бирга, у ушбу мавзу бўйича турли қарашлар мавжудлигини таъкидлаган.
Январь ойи охирида Россия Эстония билан дипломатик муносабатлар даражаси пасайганини эълон қилиб, мамлакат элчисидан Москвани тарк этишни талаб қилганди. Россия Ташқи ишлар вазирлиги Таллинни “русофобия ва Россияга нисбатан душманлик сиёсатида” бўлишда айблади. Эстония Ташқи ишлар вазирлиги бунга жавобан Россия элчисининг чиқариб юборилишини эълон қилди.
Россия Ташқи ишлар вазирлигининг баёнотидан бир неча соат ўтгач, Латвия ҳам худди шундай тарзда “Эстония билан бирдамликда” ва “Россиянинг Украинага қарши шафқатсиз тажовузкорлиги сабаб” Россия билан дипломатик муносабатлар даражасини пасайтираётганини эълон қилди. Москва ва Рига ўзаро элчиларни чиқариб юбориш ҳақида эълон қилди.
