Европа комиссияси Россияга қарши янги санкциялар пакетига 47 нафар жисмоний ва 72 та юридик шахсни қўшишни таклиф қилди. Бу ҳақда Reuters агентлиги номи ошкор этилмаган европалик дипломатларга таяниб хабар берди.
Санкциялар рўйхатига киритилганлар учун Европа Иттифоқи ҳудудига кириш тақиқланади ва уларнинг Европадаги активлари музлатилади.
Reuters хабарига кўра, 12-санкциялар тўплами лойиҳасида Европа Иттифоқи Россиядан олмос ва суюлтирилган нефть газини олиб киришни тақиқлашни, шунингдек, Россия нефтига нарх чегарасини жорий қилишни кучайтиришни таклиф қилган. Охирги чора юк ташиш компанияларидан Россияга қарашли нефть юкларини ташиш ва суғурталаш харажатларини батафсил баён қилишни талаб қилади.
“Бу қарордан мақсад шуки, юк ташиш компанияларининг танкерда олиб кетилаётган нефтнинг ҳақиқий нархини юк ташиш ва суғурта харажатлари билан бирлаштириб яширишига йўл қўймасликдир”, — дея тушунтирди Европа Иттифоқи дипломати.
Бундан ташқари, EК таклиф этаётган чора-тадбирлар Россияга сотилмайдиган товарлар рўйхатини кенгайтиради, чунки улар “Москванинг уруш ҳаракатларига ёрдам бериши мумкин”, дейди дипломат.
ЕИ 17 ноябрь куни муҳокама қиладиган янги санкциялар пакети, шунингдек, “мамлакатнинг саноат салоҳиятини оширишга қодир” товарлар ва технологияларнинг Россия орқали транзитини тақиқлашни ҳам ўз ичига олади.
Аввалроқ Польша Россия олмосларига нисбатан чекловлар жорий этиш ва жисмоний ва юридик шахсларнинг санкциялар рўйхатини кенгайтиришга чақирган эди. Литва Россияга михлар, ёнғоқлар, тикув игналари, нақшли игналар ва иситиш радиаторларини этказиб беришни тақиқлашни, Эстония эса Россия Федерацияси билан савдо-сотиқни тўлиқ тақиқлаш таклифини илгари сурди.
Изоҳ (0)