Украина президенти Владимир Зеленский Марказий Осиё журналистларига интервью берди. Қозоғистон ва Қирғизистон мамлакатлари қаторида ўзбекистонлик журналист Алишер Азимов ҳам мазкур интервьюда қатнашди.
Владимир Зеленский нима учун Марказий Осиёдан журналистларни таклиф қилгани ҳақидаги саволга жавоб берар экан, “Украинадаги уруш оқибатлари ва даҳшатларини кўрсатиш учун” дея жавоб берди. Шунингдек, Украина президенти Болтиқбўйи давлатлари, Қозоғистон ва Молдова учун ҳам шундай хавф бор, деб ҳисоблашини маълум қилди.
— Ҳеч ким ўз қарашларини тарғиб қилмаслиги учун ўзингиз маълумот олишингиз, ҳамма нарсани ўз кўзингиз билан кўришингиз муҳим. Ҳаммасига ўзингиз гувоҳ бўлишингиз учун сизга ҳеч нарса демайман. Ва мен учун мамлакатингиз урушнинг ҳақиқий оқибатларини, ҳақиқий рус “изи”ни, рус дунёсини ва у мамлакатингиз ҳудудига ҳақиқатан ҳам нимани олиб келишга ҳаракат қилаётганини кўриши жуда муҳимдир. Бунга ҳеч қандай шубҳам йўқ, бунга мутлақо аминман.
Мен ҳеч кимни қўрқитмоқчи эмасман, лекин ким хабардор ва огоҳлантирилган бўлса, кучлироқ бўлади. Шунинг учун ҳам, уларнинг ҳар бир қилган ишлари ва айтганлари, масалан, “биз Қозоғистон, Ўзбекистон, Қирғизистон билан дўстмиз, улар бизнинг биродарларимиз”, деган гапларига ишонмайман... Ҳаммаси ёлғон. Ишонинг, бу бир сонияда содир бўлади... Аввалига нимадир ишғол қилинади, айниқса, у ерда руслар бўлса...
Тирмашиб оладиган нарса бўлса бўлди! Мамлакатингиз ҳудудида мавжуд бўлган айрим озчиликлар ёки жамоалар таъқиб қилиниши керак, деб айтмаяпман. Шунчаки уларга баҳона кераклигини айтмоқчиман.
Кейин баъзи ҳудудни босиб олишни бошлашади. Шунчаки ёрдам берамиз дейишади... Лекин охири аниқ. Агар сиз, сизнинг халқингиз, Россия таркибига киришга қаршилик қилсангиз, муқаррар равишда кенг кўламли босқин, ўлим ва урушга дуч келасиз.
Шунинг учун, менимча, ҳаммасини ўз кўзингиз билан кўришингиз муҳим: уруш нима? Ўзи билан нималарни олиб келади? Умуман олганда, улар нимани хоҳлайди?
Қачонлардир бир интервьюда айтгандим — ҳамма давлатлар ҳақида эмас — Қозоғистон ҳақида гапирганман, разведка хизматларидан турли маълумотларни олаётганимда, Болтиқбўйи мамлакатлари биринчи навбатда ҳужум остида эканини англаганман: Эстония, Литва, Латвия... Биз бу ҳақда барча ҳамкорларимизга айтдик. Чунки улар Россия томонидан ушбу давлатлар чегараларини босиб олиш ёки ноқонуний кесиб ўтиш орқали НАТОнинг муносабатини синаб кўришлари мумкин.
Биз Болтиқбўйи мамлакатлари, Молдова, Қозоғистон уларнинг устувор йўналишлари эканлиги ҳақида маълумот олдик. Бу Россия Федерациясининг энг яқин мақсадлари, — деди Зеленский.
Ўзбекистонлик журналист Алишер Азимов эса қуйидагича савол берди:
— Сизга фалсафийроқ саволим бор. Қаранг, қаҳрамон Василий Петрович Голобородько, фуқаро Владимир Зеленский ва Украина президенти Зеленский — уларни ҳозир нима бирлаштирмоқда? Уларнинг феъл-атвори, тамойиллари ва бошқаларда қандай фарқ бор? Катта сиёсат сизнинг шахсиятингизни қанчалик ўзгартирди?
Владимир Зеленский уни сиёсат эмас, уруш ўзгартирганини таъкидлади.
— Мени катта ёки кичик сиёсат эмас, уруш ўзгартирди. Буни нима эканлигини худо билади. Уруш мавжуд бўлган асосий қадриятларни тубдан ўзгартирди. Мамлакат, оила, уй, болалар — бу биринчи ўринда. Айтганимдек, биз баъзан давлатлар ўртасидаги товар айирбошлаш, уни қандай ошириш, 10 та шартнома имзолаш, турли алоқа йўналишларини қуриш ҳақида ўйлаймиз.
Аслида, қадриятлар бошқача. Ҳаёт энг катта қадриятдир. Сизни ўраб турганлар ва севадиганлар бор. Мен фақат оиламни ва халқимни севаман — бу энг муҳими. Шунинг учун устуворликлар ўзгарди. Менимча, қадриятлар ўзгармади. Сиз тилга олган ҳар бир инсонни, тирик ёки хаёлий қаҳрамонларни ана шу қадриятлар бирлаштиради. Ишончим комилки, ҳар биримиз учун энг муҳими қадриятларимизни йўқотмаслик ва инсон бўлиб қолишдир. Мен инсон бўлиб қолиш учун қўлимдан келганини қилишга ишонаман.
Гарчи бу унчалик осон бўлмаса-да. Ортиқчалик йўқолганлиги ҳақиқатдир. Афсуски, менинг йўлим қийин. Кўплаб яқин ва азиз одамларим ҳам турли сабабларга кўра узоқлашди. Муайян ҳис-туйғуларга вақтим йўқ, шунчаки вақтим йўқ. Кимдир яхши, кимдир ёмонлиги учун эмас. Ҳамма ҳам бунга чидай олмайди.
Одамлар эса мени сайлаган, ҳаммасига чидашим керак. Менда бошқа йўл йўқ. Шунинг учун буни қилишга мажбурман ва буни мамнуният ва шараф билан бажараман, — деб жавоб берди Зеленский.
Шунингдек, Алишер Азимов мамлакатдаги коррупция ҳақида ҳам савол берди.
— Ташқи душман билан бирга, ички душман ҳам бор— бу коррупция. Мамлакатдаги ҳамма нарсани ўлдиради. Коррупцияга қарши қандай тизимли кураш олиб борасиз?
Владимир Зеленский эса бу саволга “Сизларда-чи?” дея қарши савол берган. Алишер Азимов “Турлича” дея қисқа жавоб берди.
— Сизда вазият қандайлигини билмайман. Узр сўрайман, эҳтимол бу каби саволга тайёр эмасдирман. Ростини айтсам, ҳамма нарсага вақтим йўқ. Қаранг, Европа Иттифоқи қонунчилиги бор ва биз ҳали ҳам Европа Иттифоқига аъзо бўлишни хоҳлаймиз. Биз учун (умумий) қадриятларимиз бор ва географик жиҳатдан Европанинг бир қисмимиз. Қонуннинг умумий қоидалари бор, улар ҳамма учун амал қилади. Коррупцияга қарши тизим — бу қоидалардан бири, давлатимиздаги коррупцияга қарши тузилма Европа давлатларникига қараганда анча қатъийроқ.
Лекин бизда коррупция йўқ, демоқчи эмасман. Афсуски, коррупция ҳамма жойда мавжуд. Курашишимиз керакми? Керак! Аммо коррупцияга қарши кураш тизими мустақил бўлиши лозим. Бу қонунларнинг барчасини биз қабул қилганимиз аниқ. Структура ишлайди. Лекин, уруш пайтида... Урушнинг замирида тартибсизлик бор. Ҳаётни, ҳуқуқларни, эркинликларни чеклаш. Лекин кимдир жанг қилади, кимдир ундан фойдаланади. Аммо агар сизда инфратузилма мавжуд бўлса, бу муҳим эмас, ҳатто кимдир буни бузса ҳам, у ҳолда бу одам жазоланади. Энг муҳими сиз коррупционерларни, олигархларни ва ҳоказоларни қўллаб-қувватламасангиз ёки яширмасангиз бўлди.
Асосийси, тегишли идоралар ўз ишини қилишига очиқ бўлишингиз керак. Менимча, сиёсий ирода муҳим, буни хоҳлайсизми ёки хоҳламайсизми. Қўллаб-қувватлайсизми ёки йўқ. Менимча, бу асосий нарса. Менда сиёсий ирода бор, ҳуқуқ-тартибот идоралари 30 йилдан бери мамлакатни талон-тарож қилган одамларни қанча кўп аниқласа, қўлга олса, уларни юзага чиқарса, Украина шунчалик бой бўлади, — деди Зеленский.
Изоҳ (0)