Европа Иттифоқининг ташқи ишлар бўйича олий вакили Жозеп Боррел Россия фуқароларига Шенген визалари берилишини бутунлай тақиқлашни таклиф қилаётган бир қатор ЕИ давлатлари позициясига қарши чиқди, деб ёзмоқда Bloomberg.
«Барча россияликларнинг (Европа Иттифоқига) киришини тақиқлаш — унчалик яхши фикр эмас. Биз кўпроқ танловли бўлишимиз керак», — деди Боррелл Испаниядаги конференцияда.
Европа дипломатияси раҳбарининг таъкидлашича, россиялик олигархларни Европа Иттифоқига киритмаслик керак, аммо «Россиядаги вазиятда яшашни истамагани учун мамлакатни тарк этишни истаган россияликлар ҳам кўп».
31 август куни Европа Иттифоқи ташқи ишлар вазирлари Прагадаги норасмий йиғилишда Россия фуқароларига Шенген визаларини беришни тўхтатишга чақирган қатор ЕИ давлатларининг таклифини муҳокама қилади. Август ойи бошида бу масала Европа Иттифоқида расмий муҳокамага қўйилган эди. Эстония, Латвия, Литва ва Чехия каби давлатлар ЕИ миқёсида тўлиқ тақиқ қўйишни қўллаб-қувватласа, Германия канцлери Олаф Шольц бу ғояни маъқулламаяпти.
Изоҳ (0)