Эстонияда Россия фойдасига жосуслик қилишда айбланган профессор 6 йилга қамалди

Эстонияда Россия фойдасига жосуслик қилишда айбланган профессор 6 йилга озодликдан маҳрум қилинди. Бу ҳақда The Moscow Times нашри хабар берди.

Манбада айтилишича, Эстония суди 18 июнь куни россиялик университет профессори Вячеслав Морозовни 6 йил-у 3 ойга озодликдан маҳрум этган. Унга Болтиқбўйи давлатида Москва номидан жосуслик қилганлик айблови қўйилган.

Сиёсатшунос ва Тарту университетининг собиқ профессори Морозов “Хорижий разведка хизмати номидан, Москва манфаати учун Эстония Республикасига қарши фаолиятда айбдор деб топилди”, — дейилган Эстония томони эълон қилган баёнотда.

Суднинг таъкидлашича, Морозов Эстониянинг ички ва мудофаа сиёсати, шунингдек, давлат амалдорлари ва инфратузилма ҳақида маълумот тўплаган. Кейинчалик бу маълумотларни Россия разведка хизматларига етказган.

Эстония расмийларининг айтишича, академик 1990 йилларда, ҳали талаба бўлганида Россия разведка хизматлари томонидан ишга олинган. Йиллар давомида ушбу хизматлар билан алоқа алмашиб турган.

Морозов жорий йилнинг январь ойи бошида Эстония Ички хавфсизлик хизмати томонидан жосусликда гумонланиб ҳибсга олинган. Унга қарши жиноий иш қўзғатилганидан сўнг, у Тарту университетидаги ўқитувчилик лавозимидан бўшатилган.

Морозов ҳибсга олинишидан олдин Facebook тармоғида Таллинда яшовчи руслар томонидан уюштирилган урушга қарши тадбирлар, шунингдек, фуқаролик жамияти ва Россиядаги сиёсий репрессиялар ҳақидаги ўз тадқиқотлари ҳақида маълумот қолдирган.

Маълумотларга кўра, Вячеслав Морозов 2010 йилда Эстонияга кўчиб келган. Бундан олдин у Санкт-Петербург давлат университетида ўн йилдан ортиқроқ профессор бўлиб ишлаган.