15 январь куни Германияда АҚШ қуролли кучлари Украина ҳарбийларини ўқитиш бўйича кенгайтирилган жанговар машғулотларни бошлади. Бу ҳақда АҚШ штаб бошлиқлари бирлашган қўмитаси раиси Марк Милли маълум қилди, деб хабар бермоқда Associated Press.
«АҚШ ҳарбийлари томонидан якшанба куни Германияда Украина қўшинлари учун янги кенгайтирилган жанговар машғулотлар бошланди», — деб ёзади агентлик Миллининг баёнотига таяниб.
Унга кўра, машғулотларда Украинадан келган 500 га яқин ҳарбий хизматчи ўқитилади.
Бундан ташқари, Associated Press хабарига кўра, Милли 16 январь куни Графенвердаги (Бавария федерал штати) машғулотлар майдонига ташриф буюришни ва машғулотлар дастури билан шахсан танишишни режалаштирган.
Аввалроқ Пентагон Украина ҳарбийларини ўқитиш мобайнида уларни АҚШнинг Bradley пиёдалар жанговар машинаси билан ишлашга ўргатиш режалаштирилгани ҳақида маълум қилганди. АҚШ ўқув машғулотларни «ойлар эмас, ҳафталар ичида» якунлашни мақсад қилган.
Европа Иттифоқи 2022 йил охирида минтақада кескинлик кучайган бир пайтда Украина ҳарбийлари учун ҳарбий тайёргарлик миссиясини яратиш имкониятини кўриб чиқа бошлаганди. Die Welt нашрининг ёзишича, ЕИ раҳбарияти буни Украина чегаралари яқинида ва Қримда «Россия ҳарбий фаолияти давом этаётганини» ҳисобга олиб, Украина билан бирдамлик ифодаси сифатида изоҳламоқда. Ҳарбий ўқитиш миссиясининг яратилишини Литва, Латвия, Эстония, Польша, Руминия ва Словакия талаб қилган. Улар Швеция ва Финляндия томонидан қўллаб-қувватланган.
Изоҳ (0)