Европа Иттифоқи томонидан 21 июнь куни қабул қилинган Россияга қарши санкцияларнинг навбатдаги, 11-пакети кучга кирди. Бу ҳақда Эстония Ташқи ишлар вазирлиги эълон қилди. Кейинроқ Европа Кенгаши сайтида ҳам янги санкциялар тўплами ҳақида мақола пайдо бўлди.
Янги чекловлар тўплами, кутилганидек, бунга қадар ўрнатилган санкцияларни четлаб ўтишга қарши чораларни ўз ичига олади. Хусусан, эндиликда Евроиттифоқнинг тегишли органлари санкция остидаги товарларнинг Россияга учинчи давлатлар орқали кириб боришига қарши тақиқларни кенгайтириши мумкин бўлди.
Янги санкцияларга Россиянинг бир қатор компаниялари ва шахслари, шунингдек, хорижий компаниялар ҳам киритилди.
Жумладан, Россиянинг ахборот хавфсизлиги соҳасидаги энг йирик компанияларидан бири Positive Technologies санкциялар остида қолди. Донецк, Луганск, Запорожье ва Херсон вилоятларида иш бошлаган “Звезда” телерадиокомпанияси, Халқаро ҳисоб-китоб банки ва TsMRBank ҳам санкция рўйхатига киритилди.
Европа Иттифоқи, шунингдек, “Дружба” қувурининг шимолий тармоғи орқали Россия нефтини импорт қилишни тақиқлади.
ЕИ Россиядан тиркамалар ва ярим тиркамаларни олиб киришни бутунлай тақиқлади ва икки томонлама мақсадли айрим товарларни (жумладан, илғор технологиялар, авиация материаллари) Россия орқали транзит қилиш тақиқини кенгайтирди.
Бундан ташқари, ҳашаматли автомобиллар экспортига тақиқ барча электр ва гибрид моделларга нисбатан жорий қилинди. Россия металлидан тайёрланган пўлат буюмлар ва маҳсулотларини ЕИга аъзо мамлакатларга импорт қилиш тақиқланди.
Кўплаб россияликлар, жумладан, Россиянинг бир қанча вилоятлари губернаторлари ҳам чеклов чораларига тушиб қолди.
Бир қатор хорижий компаниялар ҳам санкциялар остида қолди: Арманистоннинг TakoLLC, Ўзбекистоннинг иккита компанияси (Alfa Beta Creative LLC ва GFK Logistics Asia LLC), Бирлашган Араб Амирликларининг иккита компанияси (Success Aviation Services FZC ва I Jet Global DMCC), Суриянинг I Jet Global DMCC компанияси ва Эроннинг 8 та компанияси. Бундан ташқари, ЕИ Гонконгнинг учта компаниясига санкция жорий қилди: Asia Pacific Links Ltd., Tordan Industry Limited ва Alpha Trading Investments Limited.
Изоҳ (0)