Estoniya bosh vaziri va hukmron “Islohotlar” partiyasi rahbari Kristen Mixal mamlakatda yashovchi Rossiya fuqarolarini munitsipal saylovlarda faol ovoz berish huquqidan mahrum qilishga chaqirdi.
Uning qayd etishicha, hukmron “Islohotlar” partiyasi bu qarorini qonunga yoki konstitutsiyaga o‘zgartirishlar kiritish orqali rasmiylashtirishga tayyor.
“Biz uzoq vaqt davomida o‘z pozitsiyamiz haqida juda aniq gapirdik. Birinchidan, biz o‘zgarishlarni xohlaymiz — Rossiya va Belarus fuqarolari bu yerdagi mahalliy saylovlarda muammolarni hal qilmasligi kerak. Ularning ovoz berish huquqlari to‘xtatilishi yoki olib qo‘yilishi kerak. Bu qanchalik tez va huquqiy jihatdan aniq amalga oshirilsa, shuncha yaxshi”, dedi Estoniya bosh vaziri.
Mixalning ta’kidlashicha, “Islohotlar” partiyasi parlament bilan birgalikda mumkin bo‘lgan variantlarni tahlil qiladi, chunki deputatlarning aksariyati partiya pozitsiyasi bilan hamfikr.
21-oktyabr kuni “Isamaa” fraksiyasi rahbari Helir-Valdor Syeeder konstitutsiyaga uchinchi davlat fuqarolari va fuqaroligi aniqlanmagan shaxslarning munitsipal saylovlarda saylov huquqidan mahrum etilishiga ruxsat beruvchi o‘zgartirishlar kiritish to‘g‘risidagi qonun loyihasini parlamentga taqdim etdi. Tashabbus mahalliy saylovlarda ovoz berish huquqini faqat Estoniya va maxsus xalqaro shartnomalar tuzilgan davlatlar fuqarolariga qoldirishini nazarda tutadi.
Estoniyada navbatdagi munitsipal saylovlar 2025-yil 19-oktyabrda bo‘lib o‘tadi.
Izoh (0)