Идеал қоматга интиладиган баъзи аёл-қизлар ортиқча вазнни йўқотишнинг барча усулларини синаб кўришдан қўрқмайди. Тезроқ натижа кўриш ва мақсадга етиш шунчалик қизиқки, ҳатто 3 кунда 3 килограмм ташлашга ваъда берадиган парҳезлар ҳам уларда шубҳа уйғотмайди. Аслида гўзаллик қурбонликни талаб қилмайди, балки интернетдаги барча маълумотлар ҳақиқатга яқин ёки йўқ эканлигини текшириш ва саломатликка жиддий ёндашиш орқали парҳез тутилади.
Сўнгги бир неча ҳафта ичида 150 миллиондан ортиқ кўришни тўплаган чиа уруғидан тайёрланган ичимлик ҳақидаги видео трендга чиқди. Ушбу коктейлни фойдаланувчилар “Оземпикнинг арзон варианти” деб атади.
Оземпик (Ozempic) II турдаги қандли диабет билан оғриган беморларга мўлжалланган дори брендидир. Унинг таркиби глюкоза алмашинуви ва иштаҳани тартибга солишда иштирок этадиган семаглутид моддасидан иборат. Препарат ёрдамида одам деярли очликни ҳис қилмайди, бу эса ортиқча вазндан халос бўлишни осонлаштиради.
Чиа уруғи фойдаси ҳақида
Чиа уруғи ҳақиқатан ҳам жуда фойдали маҳсулот бўлиб, унда ўсимлик толалари, оқсиллар, витаминлар ва минераллар мавжуд. У ичак фаолиятини нормаллаштиришга ёрдам беради, таркибидаги антиоксидантлар ҳужайраларни эркин радикаллар таъсиридан ҳимоя қилади.
Шунингдек, чиа уруғи:
- Ортиқча вазндан қутулишга ёрдам беради, ошқозонни тўқ тутади;
- Танани кальций билан таъминлайди, шунинг учун остеопороз ва менопауза даврида истеъмол қилиш тавсия этилади;
- Таркибида мавжуд фосфор туфайли асаб тизими учун фойдали ҳисобланади ва хотирани мустаҳкамлайди;
- Уруғлар юрак фаолияти ва холестерин миқдорини пасайтириш учун зарур бўлган омега-3 ва омега-6 кислоталарига бой;
- Чиа уруғлари калийга бой бўлгани учун уларни истеъмол қилиш қон босимини пасайтиришга ёрдам беради;
- Қондаги қанд миқдорини, умуман, эндокрин тизим фаолиятини барқарорлаштиришга қодир.
Нима учун чиа уруғларини Оземпик билан таққослашмоқда?
Машҳур Оземпик дориси миядаги бошқарув марказига таъсир қилади: очлик ҳиссини камайтиради ва тўқлик ҳиссини узоқ вақтга сақлайди. Бу одамларга камроқ овқатланишга ва калория истеъмолини назорат қилишга ёрдам беради. Препарат қондаги шакар даражасини тартибга солади. Оземпикни қабул қилганлар деярли ҳеч қачон оч қолмайди. Уларнинг ширинликларга бўлган иштиёқи йўқолади.
Чиа уруғи ҳам деярли худди шундай таъсирга эга. Фақат Оземпик гормонал, чиа жисмоний жиҳатдан таъсир қилади.
Огоҳлантириш: чиа уруғлари ошқозон-ичак тракти касалликлари, қон босими муаммолари ва аллергик реакцияларда тақиқланади. Уни истеъмол қилишдан аввал шифокорингиз билан маслаҳатлашинг. Шунингдек, меъёр барча нарсада муҳим аҳамиятга эга. Ҳеч қандай суперфудлар кундалик овқатларнинг ўрнини юз фоиз тўлдирмаслиги керак. Акс ҳолда оч қолиш орқали танага жиддий зарар етиши мумкин!
Ижтимоий тармоқларда илиқ сув, чиа уруғи ва лимон сувидан иборат ичимликдан озган инсонлар ҳақидаги видеолар тарқалиб кетди. Аммо кўплаб диетологлар бу аслида плацебо эффектига эканини таъкидламоқда.
Бразилиялик блогерлардан бири тажриба ўтказди ва ҳар куни эрталаб ушбу “мўжизавий ичимлик” ичишни бошлади. 5 кун ичида у атиги 180 граммни йўқотишга муваффақ бўлди. Чунки у аввал қандай тартибда овқатланган бўлса, худди шу тарзда давом этди. Калория танқислиги бўлмаслиги натижасида вазн ўзгармай қолди.
Хулоса қилиб айтганда, чиа уруғларининг фойдали хусусиятлари кўп, аммо ушбу суперфуд вазн йўқотиш учун асосий восита бўла олмайди: агар сиз калория танқислигини яратмасангиз ва аввал истеъмол қилганингиз каби овқатланишни давом этсангиз, чиадан ҳеч қандай фойда бўлмайди.
Изоҳ (0)