Уйқуда вазн йўқотиш эндиликда миллионлаб инсонлар учун орзу эмас. Олимлар яхши уйқу озишда муҳим аҳамиятга эга эканлигини аллақачон исботлаган. Соғлом озиш асосида тўғри овқатланиш, жисмоний машқлар билан бирга тўғри ташкил этилган уйқу туради.
Тунда организм камроқ энергия сарфлайди ва метаболизм жараёни секинлашади. Афсуски, уйқуга тўймаслик қондаги қанд миқдорига таъсир қилади ва инсулин даражасини оширади. Бундан инсон оч қолади ва калорияларни сарфлаш тезлиги камаяди. Шунинг учун кечаси таомланиш тавсия этилмайди. Шунга қарамай, организмни фойдали элементлар билан таъминлаш учун уйқудан аввал ичиш мумкин бўлган ичимликлар мавжуд. Қуйида озишга ёрдам берадиган ичимликларни кўриб чиқамиз.
Зарчавали латте
Қаҳванинг ўрнини босадиган иссиқ сут ва зарчава аралашмасини таъбга кўра турли зираворлар билан бирга истеъмол қилиш мумкин. Зарчава яллиғланишга қарши, иммунитетни мустаҳкамловчи ҳамда оздирувчи хусусиятга эга бўлиб, ёғ тўқималарининг кўпайишига тўсқинлик қилади. Шунингдек, ушбу ичимлик қондаги қанд миқдорини меъёрга келтиради. Латтега ширин таъм бериш учун занжабил, долчин кабилар қўшиш мумкин.
Қатиқ
Қатиқ ичакдаги микробларнинг тўғри мувозанатини, овқат ҳазм қилиш жараёнини яхшилайди, ичак инфекциялари хавфини камайтиради, иммунитетни мустаҳкамлайди, озиқ-овқатдан муҳим моддаларни ўзлаштиришга ёрдам беради. Шунингдек, қатиқ уйқу сифатини ҳамда жисмоний машқлар самарадорлигини оширади.
Кероб какаоси
Кероб ичакдаги токсинлар билан курашишга ёрдам берадиган минералларга бой. Улар овқат ҳазм қилишни яхшилайдиган фойдали бактерияларнинг кўпайишига имкон яратади. Керобдан ўзига хос какао тайёрлаш мумкин. Бунинг учун илиқ сут, кероб ва бир чимдим стевия ўсимлиги керак бўлади.
Сут
Калций ва триптофанга бой сут мелатонин ишлаб чиқаришда фаол иштирок этади ва уйқу сифатини яхшилайди. Агар сизда лактозани ҳазм қила олмаслик касаллиги мавжуд бўлса, ўсимликлар асосида тайёрланган махсус сутни истеъмол қилишингиз мумкин.
Соя сутидан протеинли ичимлик
Протеинли ичимлик ва озиқ-овқат маҳсулотлари фақатгина спорт билан шуғулланувчи шахслар учун мўлжалланмаган. Бундай ичимлик триптофан аминокислотасига бой бўлиб, кортизол гормони (стресс)ни камайтиришга ва ортиқча вазн билан курашишга ёрдам беради.
Лавандали чой
Лаванда ўсимлигидан тайёрланган дамлама чуқур уйқу фазаси давомийлигини узайтиради ва тананинг уйқу вақтида тикланишига ёрдам беради. Дорихонада қуритилган лаванда япроқлари сотиб олаётган вақтда унинг таркибида қора ва кўк чой каби қўшимча компонентлар бўлмаслигига аҳамият беринг. Лаванда чойи уйқудан 10-15 дақиқа аввал иссиқ ҳолда ичилади.
Мойчечакли чой
Тинчлантирувчи ва уйқуни чақирувчи мойчечакли чой сизга хотиржамлик ҳиссини беради ва уйқу сифатини оширади. Унинг таркибидаги глицин моддаси танага седатив таъсир қилади ва танани бўшаштиради.
Изоҳ (0)