“Вампир билан интервью”, “Уддалаб бўлмас топшириқ” ва “Топ Ган” жанговар фильмлари туфайли машҳур бўлган америкалик актёр ва продюсер Том Круз 3 июль куни 62 ёшни қарши олди. Ўзининг ёшига нисбатан анча ёш ва бақувват кўринадиган актёр бунинг сири жиддий парҳез, қатъий интизом ва мунтазам спорт билан шуғулланишда эканини айтиб ўтди.
Круз макробиотик парҳезга амал қилади ва таомномасидан зарарли консервантлар ва кимёвий қўшимчалари бўлган озиқ-овқатларни чиқариб ташлаган. Унинг кундалик менюси сабзавотлар, мевалар, балиқ ва ёнғоқлар истеъмолига асосланган. Актёр деярли спиртли ичимликларни истеъмол қилмайди ва буғда пиширилган таомларни афзал кўради.
Том Круз истеъмол қилинадиган калория миқдорини доим назорат қилади ва кунлик меъёр 1200 килокалориядан ошмаслигига эътибор беради. Ушбу режимга риоя қилиш учун актёр шахсий ошпаз хизматидан фойдаланади. Қатъий парҳездан ташқари актёр спортга катта эътибор беради. У ҳар куни тонгги соат 5:00 дан бошлаб машқ қилади ва жисмоний фаол ҳаёт тарзини олиб боради.
Маълумот учун: Том Круз Нью Йоркда муҳандис ва ўқитувчи оиласида туғилган. У актёрликка илк қадамларини 10 ёшида мактаб театр клубида қўйган. У “Вампир билан интервью”, “Уддалаб бўлмас топшириқ”, “Топ Ган” жанговар фильмлари, “Магнолия”, “Ванилранг осмон”, “Сўнгги самурай” драмалари ва бошқа кўплаб фильмларда унутилмас образларни гавдалантирди. Узоқ йиллик фаолияти давомида у “Оскар”га номзод ва “Олтин глобус” ғолиби сифатида бир нечта мукофотларга сазовор бўлди.
Изоҳ (0)