Баъзи ҳинд актрисаларининг исмларини болаликдан биламиз. Бошқалар бизга яхши таниш, чунки улар журнал муқоваларини тарк этмайди ва нафақат ҳинд киносини, балки Голливудни ҳам забт этган. Бу актрисалар нафақат истеъдодли, балки ўзига хос услуб ва жозибага ҳам эга.
Айшвария Рай
Кўпчилик таниқли актриса Айшвария Рай актрисалик фаолиятини 1994 йилда “Дунё гўзали” танловидаги ғалабасидан кейин бошлаган деб ўйлайди. Аммо қиз ўша пайтга қадар фильмларда рол ўйнаш учун камида 4 та таклифга эга эди. Унинг иштирокидаги “Девдас” (2002) картинаси минг йилликнинг энг яхши фильмларидан бири сифатида тан олинган.
Айшвария соғлом овқатланиш тарафдори бўлса ҳам парҳезни ёқтирмаслигини тан олади. Экзотик лолаларнинг турларидан бири унинг номи билан аталган.
Фрида Пинто
Фрида Ҳиндистоннинг Бомбей шаҳрида туғилган бўлса-да, ота-онаси асли португалиялик. Унинг фамилияси португал тилида “қушча” деган маънони англатади. Қиз 11 ёшида актриса бўлишни хоҳлайди. Аммо карьерасини бошлашдан олдин 2 йил профессионал модел сифатида ишлаган.
“Оскар” мукофотига сазовор бўлган “Харобадан чиққан миллионер” фильмидаги бош қаҳрамоннинг севгилиси роли унга оламшумул машҳурлик келтиради. Шундан сўнг истеъдодли қиз ўзини кўп қиррали актриса сифатида кўрсатади, “Маймунлар сайёрасининг юксалиши” фантастик фильмида ва Вуди Алленнинг комедик драмасида рол ўйнайди. Тез орада “Жаноб Малколм рўйхати” тарихий драмаси экранга чиқади, унда Фрида бош ролни ўйнаган.
Приянка Чопра
Приянка Чопра — нафақат Болливудда, балки Голливудда ҳам машҳур актриса. Мактабни битиргач, у дастурчи ёки психолог-криминалист бўлишни хоҳлайди. Аммо 2000 йилда “Дунё гўзали” унвонини қўлга киритиб, актрисаликка ўқийди ва кинодаги фаолиятини бошлайди.
“Куантико” фильмида бош ролни ижро этишдан олдин Приянка поп юлдузи эди. У Ҳиндистонда муваффақият қозонган бир нечта мусиқий синглларни чиқаради. Айтганча, Чопра актриса Софи Тёрнернинг овсини. Ахир, уларнинг турмуш ўртоқлари мусиқачи ака-ука Ник ва Жо Жонас.
Карина Капур
Карина машҳур ҳинд режиссёри Раж Капурнинг набираси. Айтганча, машҳур бобо унга Сидхима деб исм қўймоқчи бўлган. Аввалига қиз актриса бўлишни хоҳламаган, ҳатто Гарвардда микрокомпьютерлар ва ахборот технологияларини ўрганган. Аммо бир мунча вақт ўтгач, Карина актёрлик сулоласини давом эттиришга қарор қилади.
Унинг иштирокидаги машҳур фильмлар жуда кўп — “Уч телба”, “Дўст бўлиб қоламизми?”, “Гоҳи шодлик, гоҳи ғам” шулар жумласидан. Актриса 2 та автобиографик китоб ҳам ёзган.
Кажол
Кажол Девган ҳам актёрлар сулоласининг давомчиси, сулоланинг 4-авлоди. Айшвария Рай билан бирга у Болливуднинг энг машҳур актрисаларидан бири ҳисобланади. Унинг иштирокидаги энг машҳур фильмлар “Менинг исмим Хон”, “Ҳаётда ҳамма нарса бўлади”, “Гоҳи шодлик, гоҳи ғам” ва “Ўғирланмаган келин”.
1999 йилда юлдуз актёр ва режиссёр Ажай Девган билан турмуш қурган, эр-хотиннинг 2 фарзанди бор. Кажол бўш вақтини хайрия ишларига бағишлайди ва шеър ёзади.
Сушмита Сен
Сушмита “Коинот гўзали” унвонини қўлга киритган биринчи ҳиндистонлик. Бу мукофотга 1994 йилда 18 ёшдалигида эришади. Бир неча йил ўтгач, у актриса сифатида иш бошлайди. Сушмитанинг энг катта муваффақияти машҳур актёр Шоҳрух Хоннинг севгилиси ролини ўйнаган “Мен ёнингдаман-ку” жанговар фильмидаги иштироки бўлди.
Алия Бҳатт
Алия Бҳатт режиссёр Маҳеш Бҳатт ва актриса Сония Раздан оиласида туғилган. У ўсмирлик чоғидаёқ кинода муваффақиятга эришган. “Учиб кетаётган Панжоб”даги роли учун Алия “Энг яхши аёл роли” номинациясида Ҳиндистон “Оскари”ни олади. 2022 йилда у Раж Капурнинг набираси Ранбирга турмушга чиқади.
Фильмлардаги фаолиятидан ташқари, Алия Бҳатт атроф-муҳитни муҳофаза қилиш кампанияларида иштирок этади. Шунингдек, ўзининг аёллар кийимлари брендини ишлаб чиққан. Унинг иштирокидаги сўнгги фильмлардан бири — “Гангубай Катавади” Берлин кинофестивалида намойиш этилди.
Прити Зинта
“Ўткинчи дунё” ва “Салом Намасте” фильмларининг юлдузи инглиз ва жиноий психология бўйича имтиёзли дипломга эга. Унинг актриса сифатидаги фаолияти шоколад рекламаси билан бошланган.
Актрисанинг қаҳрамонлари ҳинд фильмлари қаҳрамонлари ҳақидаги умумий қабул қилинган ғояни ўзгартирмоқда. Жумладан, “Енгилтак қиз” фильмида у турмушга чиқмасдан ҳомиладор бўлган қиз ролини ўйнаган.
Рани Мукержи
Рани оиласининг кўплаб аъзолари фаолиятини кино билан боғлаб, режиссёр, актёр, продюсерлик қилишади. “Оиламизда жуда кўп актрисалар бор эди, шунинг учун дастлаб мен бошқа одам бўлишни хоҳлардим”, — деб эслайди қиз.
Шунга қарамай, Рани фильмларда рол ўйнашни бошлайди ва ҳатто Болливуднинг энг яхши актрисалари рўйхатида биринчи ўринни эгаллайди. Бугунги кунда у кинодан ташқари хайрия ишлари билан ҳам шуғулланиб, аёллар ва болалар муаммоларига алоҳида эътибор қаратмоқда.
Дипика Падуконе
-1.jpg)
Машҳур ҳинд актрисаси Данияда туғилган, бир йилдан сўнг унинг оиласи Ҳиндистонга кўчиб ўтади. 2018 йилда Дипика йилнинг энг нуфузли 100 кишиси рўйхатига киритилади. Қиз ўз карьерасини “Коктейл” ва “Ченнай экспресс” каби романтик комедияларда қатнашишдан бошлаган. Тез орада актриса “Стажёр” комедиясининг ҳинд ремейкида ҳам кўриниш беради.
Дипика таниқли режиссёр Раж Капурнинг набираси билан муносабатда бўлган, бироқ йигит унга бир неча бор хиёнат қилганидан кейин улар ажралишади.
Ҳема Малини
Эгизак опа-сингиллар ҳақидаги машҳур фильм “Зита ва Гита” юлдузи Ҳема Малини классик ҳинд рақсларидан бири — бҳаратнатям техникасини яхши ўзлаштирилган. Аммо актриса бугун бу рақслар омма орасида унчалик машҳур эмаслигидан афсусда.
Ҳақиқий ҳаётда ҳам Ҳема Малини “Зита ва Гита" фильмидаги партнёрларидан турмуш қуриш таклифини олади. Шифокор ролини ўйнаган Санжив Кумар қизнинг ота-онасидан турмуш қуриш учун фотиҳа сўрайди, қизнинг ўзи ҳам рози бўлгандек эди. Бироқ суратга олиш жараёнида актриса бошқа ҳамкасби — ўша пайтда 4 фарзанднинг отаси Дҳармендрани севиб қолади. Ҳема ва Дҳармендранинг никоҳидан Аш ва Оҳан исмли 2 қизи бор. Улар ҳам ота-онасининг изидан бориб, фильмларда ҳам рол ўйнашни бошлади.
Изоҳ (0)