Ҳиндистонлик тадбиркор Дипак Паускар қаттиқ парҳезга ва доимий жисмоний машқларга риоя қилиш туфайли уч ой ичида 23 килограмм ортиқча вазндан халос бўлди, деб ёзади “Lisa.ru” нашри Тhе Times оф Индиа маълумотларига таяниб.
51 ёшли Паускар болалигида ва талабалик вақтларида соғлиқ ва вазн ҳақида қайғурмай, фаол ҳаёт тарзини олиб борган. Бироқ вақт ўтиб у камҳаракат ҳаёт тарзига ўта бошлади ва ёғли овқатлар истеъмол қилишга ўтди. Тадбиркор спиртли ичимликлардан ҳам тийилмас, бундай зарарли одатлар эса унинг саломатлигида муаммолар ва ортиқча вазн ҳосил бўлишига олиб келди.
“Мен доимий чарчоқ ҳис қилардим ва ҳатто оилам ва дўстларим билан сайр қилишдан завқ ололмас эдим”, — дея эслади Паускар.
Ортиқча вазн унда қандли диабет ва гипертония ривожланишига олиб келди. Шундан сўнг тадбиркор умумий саломатлиги билан жиддий шуғулланишга қарор қилди ва мутахассисларга мурожаат қилди.
Паускар калорияларни ҳисоблашни ўрганиб олди ва кунлик таомномани 2000 килокалориягача чеклади. Шунингдек, у ҳар куни 5000 қадам пиёда юрди ва спорт билан шуғуллана бошлади. Паускар кунига саккиз соат ухлаб, стрессдан узоқ бўлишга ҳаракат қилди.
Натижада Паускар қисқа фурсатда сезиларли вазн йўқотди ва ўзида соғлом турмуш тарзи одатини ҳам шакллантирди. Унинг фикрича, муваффақиятнинг асосий сири тартибли кун ва интизомдадир.
“Инсонлар умри давомида амал қилиши осон бўлган кун тартибини ёқтира бошладим”, — дейди ҳиндистонлик.
Изоҳ (0)