“Ниҳол” номидаги давлат мукофоти совриндори Феруза Жуманиёзова 14 февраль куни 39 ёшни қаршилади. Миллий қўшиқлари билан тингловчилар меҳрини қозонган Феруза Жуманиёзованинг кўпчиликка номаълум бўлган маълумотлари билан таништирамиз.
Хонанда Феруза Жуманиёзова санъаткорлар оиласида дунёга келган. Онаси Зуҳра Жуманиёзова ҳам бир пайтлар санъаткор бўлган. Аммо у ёлғиз қизининг санъаткор бўлишини истаган.
— Нафақат онам, барча қариндош-уруғларим ҳам санъаткор бўлишимга қарши бўлишган. Онам “Санъаткор аёлга қийин” деган гапни кўп айтарди. Аммо болаликдан санъат ичида улғайганим учун ҳаётимдан ундан айро тасаввур этолмадим, — дейди Феруза Жуманиёзова.
Хонанда санъатдаги фаолиятини жуда эрта бошлаган. Онаси унга 3 ёшидан аккордеон, доира чалиб, қўшиқ айтишни ўргатган.
Феруза Жуманиёзова оилада ёлғиз қиз фарзанд. Унинг акаси ва укаси бор. Аммо уларнинг ҳеч бири санъат соҳасига алоқадор эмас. Хонанда онаси ҳақида кўп гапиради, аммо бирор марта отаси ҳақида гапирмаган.
— Отам ҳаёт, аммо биз билан бирга яшамайди. Ота-онам жуда ёшлигимизда ажрашиб кетишган. Онам 3 фарзандни ёлғиз тарбиялаган. Аёл фарзандларига қанчалик меҳр кўрсатиб тарбияламасин, болалар кун келиб барибир отаси билан ҳам муносабатларини тиклар экан. Ҳозир отам билан муносабатларимиз яхши, — дейди хонанда.
Аммо Зуҳра опа қизининг санъаткор эмас, шифокор бўлишини орзу қилган. Онасининг раъйига қарши боролмаган Феруза Жуманиёзова мактабни тамомлаб, Тиббиёт институтига ўқишга кирган. Аммо бир йиллик ўқишдан сўнг Ўзбекистон давлат санъат ва маданият институтига ўқишга ҳужжат топширади. Қизининг нияти жиддий эканини билган Зуҳра Жуманиёзова у билан бирга Тошкентга келади. Она бола бир йил давомида ижара уйнинг балконида яшашади.
— Ҳақиқатан ҳам онам билан Тошкентдаги кўп қаватли уйнинг балконида яшаганмиз. Уй икки хонали эди, унинг эгалари ҳам шу ерда яшашарди. Онам ижара пули арзон бўлгани учун балконда яшашга ҳам рози бўлган, — дейди хонанда Феруза Жуманиёзова.
Феруза Жуманиёзова 14 ёшидан бошлаб, саҳналарда қўшиқ куйлаган. 2003 йил ижодкор учун омадли келди. “Кумушнинг кўзи манда” қўшиғи унга кутилмаган омад келтирди. “Кел азизим”, “Мен қўшиқ” ва “Занг-занги” қўшиқлари ҳам тингловчилар эътиборига тушди.
— Аввалдан эстрада қўшиқларини ижро этишга иштиёқим баланд бўлган. Аммо бу йўналишда куйласам шевам яққол сезилиб қоларди. Шу боис, ижодимнинг илк йилларида фақат хоразм йўналишидаги қўшиқларни ижро этганман, — дейди хонанда Феруза Жуманиёзова.
Хонанда Феруза Жуманиёзованинг танилишида “Ялла ҳабиби” қўшиғининг ўрни бўлакча. У қўшиқни 2003 йили Толиб Кулиев ва Бобур Умаровлар билан ҳамкорликда яратган. Шу кунгача бу қўшиқни ҳинд, турк, доғистон ва сербиялик хонандалар ижро этган.
— “Қўшиқни сотинг”, деган таклиф билан кўплаб хорижлик ижодкорлар мурожаат қилишган. Аммо барини рад этганман. “Эътирозим йўқ қўшиқни ижро этаверинг, фақат муаллифлик ўзимда қолади”, деганман. Охирги марта сербиялик машҳур хонанда Теа Таирович қўшиқни куйлашга рухсат сўради. Қаршилигим йўқлигини айтдим, — дейди хонанда Феруза Жуманиёзова.
Феруза Жуманиёзова ўз даврининг энг машҳур хонандаси бўлишига қарамай, унга шахсий ҳаётида омад кулиб боқмади. 2010 йили у синфдош дўсти билан оила қурди. Афсуски, уларнинг турмуши узоққа чўзилмади.
— Ҳаммаси тақдирдан. Демак, Абдуллоҳ туғилиши керак бўлган ва ўша инсон билан оила қурганман. Ҳозир ҳаётимда ҳеч ким йўқ. Бор меҳримни ўғлимга қаратяпман, — дейди хонанда Феруза Жуманиёзова.
Хонанда оналик бахтига осонлик билан эришмаганини кўп марта айтиб ўтган. Соғлиғида жиддий муаммоларга учраганининг сабаби ҳам айнан ҳомиладорлик чоғлари билан боғлиқ. Ҳомилани асраб қолиш учун хонанда кўпгина гормонлар билан боғлиқ муолажаларни олгани ҳақида ҳам яширмайди. Бундан муолажалар аёлнинг тўлишишига сабаб бўлишини эса аёллар жуда яхши билишади.
Хонанда узоқ вақт ижодий танаффусда бўлди. Буни айримлар тақиқлар билан, бошқа бировлар эса хонанданинг тўлишиб кетгани учун саҳнага чиқишни истамаётгани билан боғлашган.
Хонанда 2020 йилнинг ноябрь ойида ошқозонни кичрайтириш амалиётини бошидан ўтказди. У қисқа фурсат ичида ортиқча вазндан халос бўлиб, айни пайтда яна фаол ижодга қайтди.
Изоҳ (0)