“Путинсиз дунё яхшироқ бўларди” — Германия мудофаа вазири
Германия мудофаа вазири Борис Писториус Россия президенти Владимир Путинсиз дунё яхшироқ бўлишини айтди. У бу ҳақда Bild нашрига берган интервьюсида гапирди.
Журналист мудофаа вазиридан Россия президентисиз дунё қандай бўлиши ҳақида сўради.
“Ҳеч иккиланмасдан ва муросасиз, Путинсиз дунё яхшироқ бўларди”, — деди Германия Мудофаа вазирлиги раҳбари.
Писториус айрим россиялик тарғиботчиларнинг “Германияга ядровий зарба бериш” ҳақидаги баёнотларига изоҳ берар экан, бу қўрқув уйғотмаслигини айтди.
“Биринчидан, бу Россия ичкарида содир бўлаётган нарса, иккинчидан, бу ташвиқот. Ахир ҳеч биримиз Путин нима қилаётганини билмаймиз, аммо бу иттифоқчиларимиз билан биргаликда оқилона ёрдам кўрсатишимизга тўсқинлик қилмаслиги керак”, — деди у.
Германия мудофаа вазири Украинанинг Қрим, Донецк ва Луганскни қайтариб олиши эҳтимолини ҳам баҳолади.
“Украина ақл бовар қилмайдиган даражада жасорат билан курашмоқда. Уларнинг зўр аскарлари бор. Биз Украинани қўлимиздан келганча қўллаб-қувватлашда давом этишимиз зарур”, — дея қўшимча қилди у.
Мавзуга доир:
- “Немис танклари таҳдид қилмоқда”: Путин Германия Украинага танклар юборишига муносабат билдирди (видео)
- Путин Украинада узоқ давом этадиган урушга ҳам, ядровий зарбага ҳам тайёр эмас — ISW
