Россия расмийлари ҳозир ядро қуролидан фойдаланиш доктринасига аниқлик киритмоқда. Бу ҳақда Россия ТИВ раҳбари Сергей Лавров яманлик ҳамкасби билан бўлиб ўтган матбуот анжуманида маълум қилди.
“Америкаликлар Учинчи жаҳон уруши содир бўлса, фақат Европага таъсир кўрсатиши мумкин, деб ҳисоблайди. Бу вазиятда Россиянинг ядро қуролидан фойдаланиш доктринаси борлигини тушуниш муҳим. Айтмоқчи, ҳозир унга аниқлик киритилмоқда ва Америка расмийлари бу ҳақда жуда яхши билишади”, дейди ТИВ раҳбари.
Россия етакчиси Владимир Путин аввалроқ Россия ядровий доктринасига ўзгартиришлар киритиши мумкинлигини айтганди. Унинг сўзларига кўра, мамлакатда ўта кам қувватли портловчи ядровий қурилмалар ишлаб чиқилмоқда, Ғарбдаги экспертлар эса бундай қуроллардан фойдаланиш мумкинлиги ва улардан фойдаланиш хавфли эмаслигини таъкидлаган.
Путиннинг ушбу баёнотидан кейин АҚШ Миллий хавфсизлик кенгаши Вашингтон Москва билан Украина можаросига ҳавола қилмасдан ядровий хавф ва қурол назорати масалаларида гаплашишга очиқлигини айтган.
Шунингдек, Қўшма Штатлар нафақат ядровий хавфларни, балки Стратегик қуролларни қисқартириш бўйича шартнома (START) вориси бўладиган келишув форматини ҳам муҳокама қилишга тайёр.
Россия ТИВ вакили Сергей Рябковнинг таъкидлашича, Россия START шартномасини амалга оширишга қайтиши Вашингтон Москвага нисбатан душманлик йўлидан воз кечганидан кейингина мумкин бўлади.
Изоҳ (0)