Россия президенти Владимир Путин Ғарбнинг ҳаракатлари туфайли Россиянинг Стратегик ҳужум қуролларини тарқатмаслик тўғрисидаги шартномадаги иштироки тўхтаганини айтди. Бу ҳақда “РБК” хабар берди.
Путин НАТО Россияни стратегик мағлубиятга учратишни мақсад қилганини, хавфсизликни таъминлаш учун нафақат АҚШнинг, балки алянснинг ядровий салоҳиятини ҳисобга олиши кераклигини айтди.
“Мамлакатимизни сақлашимиз, хавфсизлик ва стратегик барқарорликни кафолатлашимиз керак. НАТОнинг барча етакчи давлатлари бизни стратегик мағлубиятга учратишни кўзлаган, уларга кўра, халқимиз бунинг ортидан жабр кўради. Қандай қилиб шундай вазиятда ядровий салоҳиятни ҳисобга олмаслик керак?” — деди Путин.
Сиёсатчи Стратегик қуролларни қисқартириш бўйича шартномадан чиқишнинг яна бир сабаби НАТО давлатларининг Украинага қурол етказиб бериши эканини қайд этди.
“Америка қўшинлари ядровий объектларимиз атрофида айланиб юришини тасаввур қила олмайман. Бу шунчаки кулгили”, — дея қўшимча қилди Путин.
Россиянинг Стратегик қуролларни қисқартириш бўйича шартномадаги иштирокини тўхтатиш тўғрисидаги қарори
21 февраль куни Россия Федерал Мажлисига мурожаати чоғида Путин мамлакат бу шартномадаги иштирокини вақтинчалик тўхтатишини эълон қилди. Эртаси куни Россия давлат думаси тегишли қонунни қўллаб-қувватлади. АҚШ давлат котиби Энтони Блинкен бу қарорни “масъулиятсизлик” деб атади. У Вашингтон “Россия аслида нима қилаётганини диққат билан кузатиши” ва хавфсизлик нуқтаи назаридан ҳаракат қилишини билдирди. Британия Путин сиёсий манфаатлар учун глобал хавфсизликни хавф остига қўяётганини таъкидлади.
Изоҳ (0)