Президент Шавкат Мирзиёев 12 август куни Бухоро вилоятида ислоҳотлар натижадорлиги ва янги лойиҳалар муҳокамаси юзасидан йиғилиш ўтказди. Бу ҳақда Президент матбуот хизмати хабар берди.
Маълум қилинишича, йиғилишда охирги саккиз йилда Бухоро вилоятига 8 миллиард доллардан ортиқ инвестиция жалб этилган. Хусусан, саноат соҳасида 6 мингта янги корхона очилган. Саноат маҳсулотлари ишлаб чиқариш ҳажми 6 баробардан зиёдга кўпайган.
Туризм инфратузилмаси яхшиланиб, янги масканлар ташкил этилган. Йиллик сайёҳлар сони 1 миллион 700 минг нафарга етган.
Жорий йил I ярмида ҳудудда саноат маҳсулотлари ишлаб чиқариш 7,3 фоизга ошган. 198 та янги саноат корхонаси ташкил топган. Ялпи ҳудудий маҳсулот ҳажми 6,4 фоизга ўсган.
Йиғилишда туркиялик тадбиркорлар Пешку туманида графит қазиб олиш ва қайта ишлашга қизиқиш билдиргани айтилган. Вьетнам компанияси замонавий турар жой, Ҳиндистон корхонаси жарроҳлик маркази қуришни режалаштиргани қайд этилган. 217 гектар майдонда 260 та лойиҳани амалга ошириб, 10 мингдан ортиқ янги иш ўрни яратиш мўлжалланган.
Вилоятда 1 миллиард 700 миллион долларлик 21 та янги лойиҳа шакллантирилган. Улар ишга тушгач 32 минг иш ўрни, 180 миллион долларлик экспорт имконияти очилиши кўзда тутилган.
Пешку туманида аҳолига ижарага берилган ерларда арзон иссиқхоналар қуриб, экспортбоп экинлар етиштириш йўлга қўйилган. Йиғилишда мазкур тажрибани оммалаштириб, вилоят бўйича қўшимча 5 минг хонадонда шундай иссиқхоналар ташкил этиш вазифасини қўйилган.
Шофиркон, Ғиждувон, Пешку ва Бухоро туманларидаги 10 минг гектарда узум, Вобкент, Ғиждувон, Жондор, Ромитан ва Когонда 5 минг гектарда ўрик, гилос, анжир каби экспортбоп мева боғларини барпо қилиш бўйича топшириқ берилган.
Вилоятда иккита йирик нефть-газ корхонаси мавжуд бўлиб, яна бири барпо этиляпти. Шунингдек, 10 та йирик қуёш ва шамол станциялари қурилиши жадаллашган. Йиғилишда мазкур мажмуалар атрофида кичик-кичик корхоналарни жойлаштириб, инвестиция, саноат ва экспорт ҳажмини ошириш мумкинлиги айтилган.
Изоҳ (0)