Агар АҚШ Россияни мағлуб этмоқчи бўлса, Москва ўзини ҳар қандай қурол, жумладан, ядровий қурол билан ҳимоя қилишга ҳақли, деди Pоссия Федерацияси Хавфсизлик кенгаши раиси ўринбосари Дмитрий Медведев.
Медведев Россия президенти Владимир Путиннинг “Россияни жанг майдонида енгиб бўлмайди” деган сўзларини келтириб ўтди.
“Стратегик ҳужум қуролларни қисқартириш бўйича АҚШ билан шартнома(“СНВ-3”)нинг тўхтатилиши (ҳозирча) шу билан боғлиқ. Ҳақиқатдан узилган АҚШ элитаси нима қилиб қўйгани ҳақида ўйлашсин. Биз бошқа ядровий кучлар — НАТО аъзолари: Франция ва Британиянинг ҳам муносабатини кузатяпмиз. АҚШ ва СССР (эндиликда Россия) ўртасидаги келишувларни тайёрлашда уларнинг стратегик ядро кучлари одатдаги ядро каллаклари ва ташувчилар балансига киритилмаган ва буни қилиш вақти келди”, — деб ёзди у Telegram-каналида.
Хавфсизлик кенгаши раҳбари ўринбосари Россиянинг “СНВ-3”даги иштирокини тўхтатиш ҳақидаги қарорни “аллақачон вақти келган” деб атади. Унинг сўзларига кўра, бунга Москвага қарши “АҚШ ва бошқа НАТО давлатлари томонидан эълон қилинган уруш” сабаб бўлган.
АҚШ президенти Жо Байденнинг Ғарб Россияга ҳужум қилмоқчи эмаслиги ҳақидаги баёнотига фикр билдирар экан, Медведев бу гаплар “ғирром ва беъмани туюлди” деди.
“Нега Россия фуқаролари ХХ ва XXI асрларда энг кўп уруш олиб борган, аммо бизни агрессия учун қоралаган АҚШ раҳбарига ишониши керак? Ўзининг заифлашиб бораётган барча интеллектуал имкониятларини Россиянинг стратегик мағлубиятини таъминлаш учун йўналтирадиган одамга”, — сўради у.
Медведев Байденнинг “Россия Украинага ҳужумни тўхтаца, уруш тугайди, агар Украина Россиядан ўзини ҳимоя қилишни тўхтаца, Украина тамом бўлади”, — деган сўзларини эслади ва буни ўз версиясига ўгирди: “Агар Россия ғалабага эришмасдан ‘СНВ-3’ни тўхтаца, Россия мавжуд бўлмайди, у парчаланади. Агар АҚШ Киев режимига қурол етказиб беришни тўхтаца, уруш тугайди”.
Изоҳ (0)