Россия Беларусда тактик ядро қуролини жойлаштиради. АҚШ ва Украина бунга қандай муносабат билдирди?

Россия президенти Владимир Путин Беларусь ҳудудига тактик ядро қуроллари жойлаштирилишни маълум қилди. Бу ҳақда “РИА Новости” хабар берди.

Путиннинг сўзларига кўра, Москва ва Минск бу бўйича келишувга эришган. Россия аллақачон Беларусга самолётларни қайта жиҳозлашда ёрдам берган. Бундан ташқари, “Искандер” ракета мажмуаси Минскка топширилган. Пути қуроллар тегишли халқаро мажбуриятларни бузмаган ҳолда жойлаштирилишини таъкидламоқда.

“3 апрелдан экипажларни тайёрлашни бошлаймиз. 1 июлда эса Беларусь ҳудудида тактик ядровий қуроллар сақланадиган махсус омбор қурилишини якунлаймиз”, — деди у. 

Россия президенти бундай қадамга Буюк Британиянинг Украинага бойитилган уранга эга ўқ-дорилар етказиб бериш тўғрисидаги баёноти сабаб бўлганини айтди. У Беларусь узоқ вақтдан бери Россия ядро қуролини ўз ҳудудида жойлаштиришни сўраганини ва Москва АҚШ ўнлаб йиллар давомида қилган ишни қилаётганини билдирди. 

“АҚШнинг маълум мамлакатларда иттифоқчилари бор, уларнинг ядро қуроли ташувчилари, экипажлари ўқитилади. Биз ҳам худди шундай қиламиз”, — деди Путин.

У Ғарб Киевга бермоқчи бўлган уранга бойитилган ўқ-дорилари оммавий қирғин қуролларига тегишли эмаслиги, лекин улар радиоактив чанг ҳосил қилиши ва шу сабабли ўта хавфли саналишини айтди. Путин улардан фойдаланиш экин майдонлари ифлослантириши, бу эса маҳаллий аҳоли учун ҳам, атроф-муҳит учун ҳам хавф туғдиришини таъкидлади.

АҚШ ва Украина Россия Беларусда тактик ядро қуролини жойлаштирилишига қандай муносабат билдирди?

АҚШ Россия ҳукуматининг эълонидан кейин Америка ядровий кучларининг тайёргарлигини ўзгартириш учун ҳеч қандай сабаб кўрмаётганини қайд этди.

“Биз Россиянинг Беларусда ядро қуроли жойлаштириши ҳақидаги хабарларни кўрдик. Ядровий кучларимизнинг тайёргарлигини ўзгартириш учун ҳеч қандай сабаб ёки Россия ядро қуролидан фойдаланишга тайёрланаётгани аломатларини кўрмадик”, — деди Пентагон.

Украина президенти офиси раҳбари маслаҳатчиси Михаил Подолякнинг айтишича, Европа Беларусда тактик ядро қуролини жойлаштириш қарорига жавобан Россияга қарши санкцияларни кучайтириши керак. Хусусан, у “Росатом”га нисбатан чекловлар жорий этишга чақирди.

Германия ташқи ишлар вазирлиги эса Россиянинг Беларусда ядро қуролини жойлаштириш режалари ҳақидаги баёнотини “ядровий қўрқитишнинг навбатдаги уриниши” деб атади.  Шунингдек, ТИВ Путиннинг НАТО мамлакатларида ядро қуролини жойлаштиришга оид мисоли “чалкаштирувчи ва бунга асос бўла олмаслигини” қайд этди.