2,5 миллиард йилдан сўнг Сомон йўли энг яқин йирик галактика — Andromeda, шунингдек, уларнинг митти йўлдошлари билан тўқнашади. Австралиялик астрономлар қўшилиш жараёнида тахминан 3 миллиард йил олдинда бўлган бир жуфт спирал галактикани ўрганиб, нима кутилаётганини аниқлашган. Тадқиқот натижалари Monthly Notices of the Royal Astronomical Society (MNRAS) журналида эълон қилинди.
Квинсленд университети профессори Сара Суит раҳбарлигидаги гуруҳ Delegate лойиҳаси доирасида NGC 5713 ва NGC 5719 галактикаларини кузатган. Бу галактикалар аллақачон бир-бири ва атрофида айланаётган йўлдошлари билан “космик рақс”га тушган. Олимларнинг фикрича, бундай ўзаро таъсирлар митти галактикаларни тартибсиз булут ўрнига Сомон йўли ва Andromeda каби мунтазам текисликларда жойлашишига ёрдам беради.
“Бу, эҳтимол, галактикамизнинг йўлдошлар тизимига ўхшаш тузилмалар қандай шаклланиши ва келажакда уларнинг қандай ўзгариши ҳақидаги энг аниқ тасаввурдир”, деди Суит.
Ушбу тадқиқот галактикалар эволюцияси, қоронғи материянинг тақсимланиши ва коинотнинг кенг миқёсдаги тузилишини аниқроқ моделлаштириш имконини беради. Бундан ташқари, у Сомон йўли ва Andromeda тарихининг қанчалик ноёблиги ёки бу коинот учун одатий ҳодиса эканини кўрсатади.
Бундан аввал 2032 йилда астероид Ой билан тўқнашиб, Ер орбитасидаги сунъий йўлдошларни шикастлаши мумкинлиги хабар қилинганди.
Июль ойи охирларида Амстердам университети астрономлари ғайриоддий TOI-2431 б экзосайёрасини кашф этишгани маълум қилинганди. Бу сайёрада бир йил атиги 5,4 Ер соатида “ўтиб кетади”. У Ердан бор-йўғи 117 ёруғлик йили узоқликда жойлашган.
Изоҳ (0)