Италия разведкаси Россиянинг Украинадаги урушда кўзлаган мақсади барбод бўлганини маълум қилиб, Москванинг кейинги ҳаракатларини прогноз қилди. Бу ҳақда La Stampa хабар берди.
Разведкага кўра, эндиликда Россияга узоқроқ урушга тайёргарлик кўриш учун Украинага қарши ҳарбий ҳаракатларда оператив пауза зарур. Бу вақт ичида Россия ҳарбий-саноат комплекси ишини қайта бошлаши мумкин. Италия разведкаси парламентга тақдим этган ҳисоботида шундай прогноз берилган. Ғарб томонидан Украинага бостириб кириш муносабати билан қўлланилган санкциялар таъсирини Россия йирик ишлаб чиқариш қувватига қарамай ҳис қила бошлагани таъкидланган.
Бундан ташқари, разведкачилар Россияда урушни қўллаб-қувватлаш даражаси пасайганини қайд этмоқда. Шунга қарамай Кремл раҳбарияти ҳаракатларини маъқуллайдиганлар ҳам учраб туради. Бу Россия оммавий ахборот воситаларининг ташвиқоти билан боғлиқ экани айтилган. Шу билан бирга, Россиянинг Ғарб мамлакатларидаги сиёсий жараёнларга аралашиши ҳақида маълум қилинган.
“Москва НАТО мамлакатларидаги сиёсий динамика ва қарорлар қабул қилиш жараёнларига аралашишни тўхтатмайди. Киберҳужумлар, дезинформация, шантаж, миграция ва энергетика каби воситалардан фойдаланиш каби манипулятив усулларига олдингидан ҳам кўпроқ мурожаат қилмоқда. Ғарбнинг Россияга энергетик қарамликка муқобил йўл топиш истагини ҳисобга олсак, иккинчиси ўз аҳамиятини йўқотишга маҳкумдир”, — дейилади хабарда.
Италия махсус хизматлари Путиннинг режалари “Украина сценарийсини нотўғри тушуниш туфайли” барбод бўлганини, шу билан бирга, Россиянинг ядро қуролидан фойдаланиш эҳтимоли пастлигини хулоса қилди.
Изоҳ (0)