Украинадаги можаронинг бошланишида Россия Қуролли Кучлари (ҚК) жангчилари Киевга магистрал йўл орқали тўрт соатда етиб бориши мумкин эди. Бу ҳақда АҚШ президенти Дональд Трамп брифингда маълум қилди.
Унинг айтишича, қайсидир генерал техникани қишлоқ хўжалиги ерлари орқали олиб ўтишга қарор қилган, натижада улар лойга ботиб қолган.
“Мен бу генерал ким эканлигини билмайман, лекин Владимирни (Путинни) билганимдан, эҳтимол, у энди йўқдир”, дея таъкидлаган Америка раҳбари.
Трамп украиналикларга ўзининг биринчи президентлик муддатида етказиб бериш тасдиқланган Javelin танкка қарши ракета комплекслари ёрдам берганини таъкидлаган.
Журналистнинг можарода Украина ғалаба қозониши мумкинлиги ҳақидаги саволига Дональд Трамп кескин жавоб бериб, бу саволни “аҳмоқона” деб баҳолаган.
“Россия - жангчилар мамлакати. Улар айнан шу билан шуғулланадилар: кўп урушлар олиб борадилар. Улар Гитлер ва Наполеонни енгишган”, деди Қўшма Штатлар президенти.
Шунингдек, АҚШ раҳбари Венгрия бош вазири Виктор Орбан билан Украина можаросининг истиқболлари ҳақидаги суҳбати ҳақида гапирган. АҚШ президентининг сўзларига кўра, у Орбандан Украина Россияни енга оладими, деб сўраганида, у “худди бемаъни савол берилгандек унга қараган”.
“У Россия улкан мамлакат эканини айтди. Ва улар ўз мавжудликлари учун курашмоқдалар. Улар жанг қилишади - бу уларнинг қўлидан келади. Хитой сизни савдода, Россия эса урушда енгмоқда”, дея Венгрия раҳбарининг сўзларини етказган Қўшма Штатлар раҳбари бу баёнотни “жуда қизиқарли” деб баҳолаган.
Путин ва Трампнинг учрашуви 15 август куни Аляскада ўтказилиши кутилмоқда. Икки давлат раҳбарлари музокараларининг асосий мавзуси Украинадаги можарони ҳал этиш бўлади. Хусусан, президентлар ҳудудларни алмашиш ва Киевнинг НАТОга аъзо бўлишдан воз кечиши ҳақида гаплашишлари мумкин.
Изоҳ (0)