Беларусь президенти Александр Лукашенко иккинчи Евросиё иқтисодий форумининг ялпи мажлисида Россия президенти Владимир Путинга республика ҳудудида тактик ядро қуролини жойлаштириш қарори учун миннатдорлик билдирди.
Икки давлат раҳбарлари ўртасидаги суҳбат Қозоғистон президенти Қосим-Жўмарт Тўқаевнинг Россия ва Беларусда ядровий қурол борлиги ҳақида айтган нутқи пайтида бўлиб ўтди. Ўша пайтда Путин ва Лукашенко ўзаро фикр алмашишди ва қўл сиқишди.
“Ядро қуроли ҳақида гап кетганда, ростини айтсам, мен буни акустика туфайли эшитмадим ва Владимир Владимирович менга Беларусда тактик ядро қуролини жойлаштириш қарори қабул қилинганлигини айтди, мен эса бу қарор учун раҳмат деб айтдим.
Муҳокама қилинган нарса шу, бошқа гап йўқ”, — деди Александр Лукашенко журналист Павел Зарубиннинг Қосим-Жўмарт Тўқаев нутқи чоғида етакчилар ўртасидаги қандай суҳбат бўлгани ҳақида берган саволига жавобан.
Жорий йилнинг 25 март куни Владимир Путин Беларусда Россия ядро қуролини жойлаштириш қарорини эълон қилди. Унинг сўзларига кўра, ядро қуролини сақлаш учун махсус жой қурилиши шу йилнинг 1 июлга қадар якунланади.
Изоҳ (0)