Markaziy saylov komissiyasining bir mandatli saylov okrugi hamda yagona saylov okrugi bo‘yicha Qonunchilik palatasiga partiyalar ro‘yxati asosida saylangan deputatlarni ro‘yxatga olish to‘g‘risida qarori qabul qilindi.
Ro‘yxatga ko‘ra, beshta partiya raislari deputatlikka saylangan. Jumladan, O‘zLiDeP partiyasi raisi Aktam Xaitov, “Milliy tiklanish” raisi Alisher Qodirov, Ekopartiya raisi Abdushukur Xamzayev, XDP raisi Ulug‘bek Inoyatov hamda “Adolat” SDP raisi Robaxon Maxmudova deputat etib saylandi.
Shu bilan birga, Akmal Saidov, Narimon Umarov, Boriy Alixanov, Nuriddin Ismoilovlar ham yagona saylov okrugi bo‘yicha deputat etib saylangan.
Bir mandatli saylov okruglari saylangan deputatlar ro‘yxatida esa O‘zbekiston vazirlari yo‘q.
Avvalroq ijtimoiy tarmoqlarda madaniyat vaziri Ozodbek Nazarbekov hamda maktabgacha va maktab taʼlimi vaziri Hilola Umarova lavozimini tark etib, deputatlikni tanlangani haqida xabarlar tarqalgan edi.
Dushanba kuni deputatlik saylovining dastlabki natijalari e’lon qilingandi.
O‘zbekistonda Oliy Majlis Qonunchilik palatasi va mahalliy kengashlar deputatlari saylovida ovoz berish jarayoni 27-oktyabr kuni 11 ming 28 ta saylov uchastkalarida soat 08:00 da boshlanib, soat 20:00 gacha davom etdi.
Bu yilgi saylovlarda saylov jarayonini boshqarishning avtomatlashgan tizimidagi saylovchilarning elektron ro‘yxatiga O‘zbekistondagi 19 million 944 ming 859 nafar saylovchi kiritilgandi. Bundan tashqari, chet ellardagi saylovchilar 165 ming 631 nafarni tashkil etdi. Shundan 140 388 nafari saylovda ishtirok etdi.
40 ta xorijiy davlatdagi O‘zbekiston diplomatik vakolatxonalarida 57 ta saylov uchastkalari tashkil etilgan. Xorijdagi saylov jarayonlarining dastlabkisi Yaponiya va Koreya Respublikasidagi diplomatik vakolatxonalarida Toshkent vaqti bilan soat 04:00 da boshlandi. Ovoz berish jarayonlarining so‘ngisi AQSHdagi vakolatxonalarda Toshkent vaqti bilan 28-oktyabr soat 05:00 da yakunlandi.
27-oktyabr soat 13:00 holatiga ko‘ra, 19 944 859 nafar saylovchidan 9 948 589 nafari yoki 47,62 foizi ovoz berishda ishtirok etdi va deputatlik saylovi o‘tgan deb hisoblandi.
Bu yilgi saylovlar yangilangan Konstitutsiya va milliy saylov qonunchiligiga binoan, aralash saylov (majoritar-proporsional) tizimi asosida o‘tkazildi.
Izoh (0)