Qonun loyihasi bilan Qonunchilik palatasi va Senatga o‘zini o‘zi tarqatib yuborish vakolati berilayotgani haqida xabar berilgan edi. Oliy Majlis Qonunchilik palatasi spikeri o‘rinbosari Odiljon Tojiyev bu parlament saylovi muddatidan ilgari o‘tkazilishini anglatmasligini bildirdi.
Kuni kecha Oliy Majlis palatalari faoliyatiga taalluqli qonun loyihasi keng jamoatchilik o‘rtasida turli savollar, xususan, parlament saylovi muddatiga oid va boshqa mazmundagi savollar paydo bo‘lishiga sabab bo‘ldi. Odiljon Tojiyev bu boradagi savollarga javob berdi.
Uning qayd etishicha, mazkur qonun loyihasi bilan 14 ta qonun (jumladan, Saylov kodeksi)ga o‘zgartirish va qo‘shimchalar kiritilishi kutilmoqda. Xo‘sh, bunga qanday zarurat bor edi?
“Konstitutsiyamizga parlament palatalarining vakolatlari va huquqlariga oid yangi normalar kiritilgan edi, lekin bu normalar tegishli qonun va qonunosti hujjatlarda mavjud emas. Bu boradagi bo‘shliqni to‘ldirish maqsadida bir guruh deputatlar o‘zlari tashabbus ko‘rsatib, mazkur qonun loyihasini ishlab chiqishdi va palataga kiritishdi.
“Qonun loyihasida ushbu vakolatning belgilanayotgani joriy yilda muddatidan ilgari parlament saylovi bo‘lib o‘tishini anglatmaydi. Qonun loyihasi endigina mas’ul qo‘mita va fraksiyalar yig‘ilishlarida konseptual jihatdan ko‘rib chiqildi”, — deydi Qonunchilik palatasi spikeri o‘rinbosari.
Bundan tashqari, qonun loyihalari mas’ul qo‘mita, fraksiyalar, umuman yalpi majlisda kamida yana ikki bosqichli muhokamalardan o‘tadi va Senatga ma’qullash uchun yuboriladi. Senat ma’qullagach esa, prezident imzolaydi va kuchga kiradi.
“Qonun ijodkorligining o‘ziga xos jihatlariga birma-bir to‘xtalganimning sababi shundaki, toki bu qonun loyihasi parlament palatalari va prezident tomonidan qabul qilinib, kuchga kirguniga qadar bo‘lgan oraliq vaqt qisqa emas, bu esa joriy yilda muddatidan ilgari parlament saylovi bo‘lib o‘tishi mumkinligi haqidagi “bashorat”lar haqiqatga to‘g‘ri kelmasligini yana bir isbotlaydi”, — deydi Odiljon Tojiyev.
27-sentyabr kuni bo‘lib o‘tgan yalpi majlisda ushbu qonun loyihasi birinchi o‘qishda ko‘rilib, deputatlar tomonidan qabul qilindi. Odiljon Tojiyevning ta’kidlashicha, endi qonun loyihasi matni jamoatchilikning taklif va mulohazalarini olish uchun Qonunchilik palatasining saytiga joylashtiriladi. Jamoatchilik muhokamasidagi takliflar, fikrlar asosida qonun loyihasi takomillashtiriladi.
Izoh (0)