Bugun, 25-avgust kuni Iordaniya podshohi Abdulla II ibn al-Husayn prezident Shavkat Mirziyoyev hamrohligida Samarqand shahrining tarixiy obidalari bilan tanishdi.
Prezident matbuot xizmati xabariga ko‘ra, davlat rahbarlari avval Shohi Zinda majmuasiga tashrif buyurgan.
“Majmua Payg‘ambarimiz Muhammad alayhissalomning sahobalaridan biri Qusam ibn Abbos va boshqa arboblarning maqbaralaridan tashkil topgan. Majmuaning tarixiy, madaniy va badiiy ahamiyati shundaki, u meʼmorchilik va bezak sanʼatining bir necha asr davomidagi taraqqiyotini aks ettiradi. Shohi Zinda 2001-yilda YUNESKOning Butunjahon merosi ro‘yxatiga kiritilgan. Rasman Payg‘ambarimiz Muhammad alayhissalomning qizi Fotima va kuyovi Ali ibn Abu Tolibning avlodlari hisoblangan Hoshimiylar sulolasi vakili bo‘lgan Iordaniya podshohi Qusam ibn Abbos xotirasiga hurmat bajo keltirdi. Qurʼon tilovat qilindi”, deyiladi manbada.
Amir Temur maqbarasi ziyorati chog‘ida Iordaniya delegatsiyasiga buyuk sarkardaning davlatchilik siyosati, harbiy mahorati, turli mamlakatlar bilan diplomatik aloqalari haqida so‘zlab berilgan. Sohibqiron hayoti va faoliyati, uning davlati o‘z davrining eng ulkan mamlakati bo‘lgani mehmonlarda katta taassurot qoldirgan.
O‘z navbatida davlat rahbarlari Mirzo Ulug‘bek, Sherdor va Tillakori madrasalaridan iborat Registon majmuasini ham ziyorat qilgan.
Tanishuv chog‘ida oliy martabali mehmonga ushbu inshootlarning bunyod etilish tarixi va naqshlarining o‘ziga xos jihatlari, maydonda olib borilgan restavratsiya ishlari haqida maʼlumot berilgan.
Joriy yil 25-26-avgust kunlari Samarqandda O‘zbekiston-Iordaniya sammiti tadbirlari bo‘lib o‘tadi. Abdulla II ibn al-Husayn 25-avgust kuni Shavkat Mirziyoyev taklifiga binoan Samarqandga kelgan. Oliy darajadagi muzokaralarda siyosiy, savdo-iqtisodiy va investitsiyaviy hamkorlikni rivojlantirish masalalarini ko‘rib chiqish rejalashtirilgan.
Izoh (0)