Gruziya prezidenti Salome Zurabishvili parlament saylovlari tan olinmaganini e’lon qildi va xalqni ommaviy namoyishlarga chiqishga chaqirdi.
“Bu sizning ovozlaringizni butunlay soxtalashtirish va musodara qilish edi. Biz turli mamlakatlarda ko‘rgan barcha usullar qo‘llandi”, dedi u.
Bir kun oldin bo‘lib o‘tgan ovoz berishdan keyingi birinchi murojaatida Zurabishvili, uning fikricha, Rossiya aloqador bo‘lgan qonunbuzarliklarni ta’kidlagan.
“Biz xalqimiz va mamlakatimizga qarshi gibrid urushning yangi shakllaridan biri bo‘lgan Rossiya maxsus operatsiyasining guvohi va qurboniga aylandik”, deya qo‘shimcha qilgan prezident.
Uning ta’kidlashicha, “ushbu saylovlarni tan olish Rossiyaning mamlakatga kelishini, Gruziyaning Rossiyaga bo‘ysunishini tan olish bilan barobardir”. Prezident saylov natijalaridan norozi bo‘lgan barchani Tbilisidagi Rustaveli prospektida 28-oktyabr kuni kechqurun o‘tkazilishi rejalashtirilgan norozilik aksiyasida ishtirok etishga chaqirgan.
Gruziyaning qamoqdagi sobiq prezidenti Mixail Saakashvili ham norozilik namoyishi o‘tkazishga chaqirgan. U muxolif partiyalarning parlament saylovlaridan keyin deputatlik mandatlaridan voz kechish qarorini qo‘llab-quvvatlagan.
“Albatta, hech kim parlamentga kirmasligi kerak! Hozir katta norozilik namoyishlarining ayni vaqti. Biz butun dunyoga ozodlik uchun kurashayotganimizni hamda biz adolatsizlikka toqat qilmaydigan xalq ekanimizni ko‘rsatishimiz kerak. Vaqt juda oz”, deb yozgan Saakashvili Facebook’dagi sahifasida e’lon qilgan bayonotida.
Izoh (0)