Yangi talablar va partiyalararo raqobat muhitida bo‘lib o‘tgan Oliy Majlis Qonunchilik palatasi va xalq deputatlari mahalliy kengashlariga saylov ham ortda qoldi. Besh yilda bir o‘tkaziladigan ushbu siyosiy tadbir ochiqlik, oshkoralik tamoyillar asosida bo‘lib o‘tdi.
Markaziy saylov komissiyasining saylov yakunlari bo‘yicha bergan bayonotida ikkita saylov tizimi bo‘yicha, O‘zbekiston Liberal-demokratik partiyasidan – 64 ta o‘rin yoki 42,7 foiz, “Milliy tiklanish” demokratik partiyasidan – 29 ta o‘rin yoki 19,3 foiz, “Adolat” sosial-demokratik partiyasidan – 21 ta o‘rin yoki 14 foiz, Xalq demokratik partiyasidan – 20 ta o‘rin yoki 13,3 foiz, Ekologik partiyasidan – 16 ta o‘rin yoki 10,7 foiz o‘rin egalladi.
Bu galgi saylovda O‘zLiDeP tarixdagi eng yaxshi natija qayd etdi. Partiya 2019-yilda bo‘lgan saylovda 53 ta deputatlik o‘rnini egallab, Oliy Majlis Qonunchilik palatasida eng yirik fraksiyani tashkil etgan edi. Bu safar O‘zLiDeP oldingi saylovga nisbatan 11 ta ko‘p deputatlik o‘rniga ega bo‘ldi. Bu mamlakat partiyalari tarixidagi eng yaxshi natija ham hisoblanadi.
O‘zLiDeP saylov kampaniyasi va tashviqot bosqichida aholini qiynayotgan ko’plab muammolar va ularning kelgusidagi yechimiga e’tibor qaratdi.
Birgina misol: kelgusida aholi jon boshiga daromadni 4 ming dollarga yetkazish, 1 million xonadonli uy-joy qurish taklifi partiya dasturidan alohida o‘rin egalladi.
Shu va boshqa shu kabi omillar partiyaga bu yilgi saylovda muvaffaqiyat qozonishga yordam bergan bo‘lsa ajab emas.
Izoh (0)