Senat raisi Tanzila Norboyeva prezident saylovida ovoz berdi

Oliy Majlis Senati raisi Tanzila Norboyeva prezidentlik saylovida o‘zi yoqlagan nomzodga ovoz berdi.

Tanzila Norboyeva 576-saylov uchastkasida prezidentlik saylovida nabirasi bilan ishtirok etdi. Senat raisi “Daryo” muxbiri bilan suhbatda O‘zbekistonda saylov tizimi takomillashib borayotganini aytdi.

“Barcha siyosiy partiyalar, jamoat tashkilotlari va OAV vakillarining jarayonni bemalol kuzatayotgani mamlakatimizda saylov tizimining tobora takomillashib borayotganidan dalolat beryapti. Tizimning jahon standartiga xos takomillashtirilishi avvalo qonun chiqaruvchilarning, Markaziy saylov komissiyasining, siyosiy partiyalar, jamoat tashkilotlari, qolaversa, OAVning hamkorlikdagi ko‘p yillik faoliyatimiz natijalari deb bilamiz. O‘ylaymanki, keyingi o‘tkaziladigan saylovlar ham takomillashib boraveradi. Saylovda 16 ta xalqaro tashkilotlar, 50 ga yaqin davlatlar vakillari, Yevropada xavfsizlik va hamkorlik tashkilotining Demokratik institutlar va inson huqulari byurosining 244 nafar kuzatuvchilari qatnashayotgani juda ham ahamiyatli”, — dedi Senat raisi

Eslatib o‘tamiz, bugun (9-iyul) O‘zbekistonda prezidentlik saylovi bo‘lib o‘tmoqda. To‘rt nafar nomzod prezidentlik uchun kurashmoqda. Ular — Xalq demokratik partiyasidan Ulug‘bek Inoyatov, O‘zLiDePdan Shavkat Mirziyoyev, “Adolat” partiyasidan Robaxon Mahmudova hamda Ekopartiyadan Abdushukur Hamzayev.

Saylovda g‘olib bo‘lgan nomzod prezidentlikka 7 yilga saylanadi. Bu haqda yangilangan Konstitutsiyada belgilab qo‘yilgan.