O‘zbekistonda muddatidan ilgari prezidentlik saylovi qachon o‘tkazilishi maʼlum qilindi

Shavkat Mirziyoyev muddatidan ilgari prezidentlik saylovini o‘tkazish bo‘yicha farmonni imzoladi. Bu haqda Prezident matbuot xizmati xabar berdi. 

Xabarga ko‘ra, Konstitutsiyaning 110 va 128-moddalari hamda O‘zbekiston Saylov kodeksining 66-moddasiga asosan:

• 2023-yil 9-iyul kuniga muddatidan avval O‘zbekiston prezidenti saylovi tayinlandi;
• mazkur farmon Markaziy saylov komissiyasiga yuborilishi belgilandi.

Shavkat Mirziyoyev nima sababdan muddatidan ilgari prezidentlik saylovi o‘tkazilishini izohlagan edi.

“Nima uchun qolgan uch yarim yillik prezidentlik muddatidan o‘z tashabbusim bilan voz kechyapman? Chunki asosiy qonunimizga muvofiq:

birinchidan, hokimiyatning barcha bo‘g‘inlari isloh qilinib, ular o‘rtasidagi munosabat va muvozanat jiddiy o‘zgarmoqda;

ikkinchidan, yangilangan Konstitutsiyamiz prezident, parlament, hukumat, vazirlar va hokimlar oldiga kechiktirib bo‘lmaydigan yangi siyosiy, ijtimoiy va iqtisodiy vazifalarni qo‘ymoqda;

uchinchidan, xalqimiz bizdan barcha sohalarda g‘oyat muhim va dolzarb o‘zgarish hamda islohotlarni kutmoqda;

to‘rtinchidan, dunyoda va mintaqamizda keskin, murakkab jarayonlar hukm surayotgan hozirgi vaziyatda to‘g‘ri va samarali rivojlanish yo‘lini izlab topish, uni amalga oshirish eng o‘tkir va dolzarb masalaga aylanmoqda. Aziz va muhtaram vatandoshlar, barchangiz ko‘rib turibsiz, oldimizga bugun yanada ulkan marralar qo‘ymoqdamiz”, — dedi prezident.