10-aprel, yakshanba kuni Fransiyada prezidentlik saylovlarining birinchi bosqichi bo‘lib o‘tmoqda. Davlat rahbari lavozimi uchun 12 nafar nomzod kurashmoqda. Saylovning asosiy favoritlari – mamlakatning amaldagi yetakchisi Emmanuel Makron va “Milliy ralli” partiyasi rahbari Marin Le Pen xonim.
So‘nggi so‘rovlarga ko‘ra, Makron va Le Pen ikkinchi turga chiqish uchun eng yaxshi imkoniyatga ega, biroq saylovchilarning faolligi ovoz berish natijalariga sezilarli ta’sir ko‘rsatishi mumkin. Siyosatshunoslarning prognozlariga ko‘ra, faollik rekord darajada past bo‘lishi mumkin.
Fransuzlar davlat rahbarini besh yillik muddatga saylashi kerak. Agar birinchi turda nomzodlarning hech biri mutlaq ko‘pchilikni (50 foizdan ko‘p ovoz) ololmasa, ikkinchi tur o‘tkaziladi. Beshinchi Fransiya Respublikasi tarixida birorta ham prezidentlik saylovi birinchi tur bilan yakunlanmagan.
Saylovchilar ro‘yxatida 48,7 million fransuz bor. Yakshanba kuni butun Fransiya bo‘ylab 70 mingga yaqin saylov uchastkalari ishlaydi. Ular 8:00 (Toshkent vaqti bilan 11:00) da ochiladi. Ko‘pgina fransuz kommunalarida 19.00 (Toshkent vaqti bilan 22:00) gacha ovoz berish mumkin bo‘ladi. Katta shaharlarda, jumladan Parij, Lion, Marsel, Nitsa, Bordo, Tuluza va boshqalarda saylov uchastkalari soat 20:00 (Toshkent vaqti bilan 23:00)gacha ishlaydi.
Fransiyaning boshqa vaqt zonalarida joylashgan xorijiy departamentlarida ovoz berish 9-apreldan boshlangan.
Yakshanba kuni saylov uchastkalari yopilgach, exit poll ma’lumotlari e’lon qilinadi. Keyin birinchi bosqichning dastlabki natijalari Fransiya Ichki ishlar vazirligi saytida e’lon qilinadi. Kun davomida esa vazirlik odatda saylovchilarning ishtiroki haqidagi ma’lumotlarni berib boradi.
13-aprel, chorshanba kuni Fransiya Konstitutsiyaviy kengashi 24-aprelga belgilangan saylovning birinchi bosqichi natijalarini va ikkinchi turga o‘tadigan ikki nomzodni tasdiqlashi kerak.
Shuningdek, 10-aprel kuni qisman tan olingan Janubiy Osetiya Respublikasida ham prezidentlik saylovlari bo‘lib o‘tmoqda. Respublika Markaziy saylov komissiyasi ma’lumotlariga ko‘ra, ovoz berish mamlakatdagi 72 ta saylov uchastkasida bo‘lib o‘tadi, Rossiya, Abxaziya va Shimoliy Osetiya poytaxtlarida yana to‘rtta saylov uchastkalari ochiladi. “Jami 32 mingdan ortiq saylovchi ro‘yxatga olindi”, — deyiladi MSK xabarida.
Prezidentlik saylovlarini mahalliy jurnalistlardan tashqari Rossiya ommaviy axborot vositalarining 20 ga yaqin vakili yoritadi. Jarayonni kuzatish uchun Janubiy Osetiyaga 40 dan ortiq xalqaro kuzatuvchilar – Rossiya, Donbass Respublikalari, Abxaziya, Avstriya, Venesuela, Germaniya, Tog‘li Qorabog‘, Nikaragua, Finlyandiya va boshqalardan delegatsiyalar keladi.
Respublikaning oliy davlat lavozimi uchun besh nomzod — amaldagi davlat rahbari Anatoliy Bibilov, parlament spikeri o‘rinbosari Aleksandr Pliev, “Nixas” siyosiy partiyasi rahbari Alan Gagloev, deputat Garri Muldarov va sobiq deputat Dmitriy Tasoyev kurashmoqda.
Respublika rahbari besh yil muddatga saylanadi. Bir shaxs bu lavozimni ketma-ket ikki muddatdan ortiq egallashi mumkin emas.
Amaldagi prezident Anatoliy Bibilov ushbu lavozimga 2017-yilning aprel oyida saylangan edi. 30-mart kuni Bibilov Janubiy Osetiya Rossiyaga qo‘shilishni rejalashtirayotgani haqida ma’lum qilgan.
“Rossiya bilan birlashish bizning strategik maqsadimiz, deb hisoblayman. Bizning yo‘l. Odamlarning intilishlari. Va biz bu yo‘ldan boramiz. Yaqin kunlarda tegishli qonuniy choralar ko‘ramiz. Janubiy Osetiya Respublikasi o‘zining tarixiy vatani – Rossiyaning bir qismi bo‘ladi”, — dedi Bibilov.
Uning matbuot xizmati Janubiy Osetiyaning Rossiya tarkibiga kirishi bo‘yicha barcha qonuniy tartib-qoidalar prezidentlik saylovlaridan so‘ng yakunlanishini ma’lum qilgan.
Izoh (0)