Gretsiyada 25-iyun, yakshanba kuni bo‘lib o‘tadigan takroriy parlament saylovlarida sobiq bosh vazir Kiriakos Mitsotakisning hukmron konservativ “Yangi demokratiya” partiyasi g‘alaba qozondi. Mamlakat Ichki ishlar vazirligi maʼlumotlariga ko‘ra, byulletenlarning 99,61 foizi sanab chiqilgach, partiya 40,55 foiz ovoz to‘plagani ma’lum bo‘ldi.
Ikkinchi o‘rinni 17,84 foiz ovoz bilan sobiq bosh vazir Aleksis Tsiprasning so‘l qanot muxolif “SIRIZA” partiyasi egalladi. Uchinchi o‘rin so‘l markazchi “PASOK” partiyasiga nasib qildi (11,85 foiz).
Gretsiya saylov qonunchiligiga ko‘ra, birinchi o‘rinni qo‘lga kiritgan partiya kamida 20 ta qo‘shimcha deputatlik mandatini oladi. Bu shuni anglatadiki, “Yangi demokratiya” Gretsiya parlamentida mutlaq ko‘pchilikni qo‘lga kiritishi mumkin — taxminan 300 ta o‘rindan 158 ta.
May oyida o‘tkazilgan saylovlar bilan hukumatni shakllantirib bo‘lmadi
Bu Gretsiyada so‘nggi besh hafta ichida ikkinchi parlament saylovi. 21-may kuni bo‘lib o‘tgan avvalgi ovoz berish natijalariga ko‘ra, 40,79 foiz ovoz bilan “Yangi demokratiya” g‘alaba qozongan. Biroq o‘sha paytda o‘ng markazchilar koalitsion hukumat tuza olmagan va bu takroriy saylovlar belgilanishiga olib keldi.
Gretsiyada konservatorlar 2019-yildan buyon mamlakatni boshqarib kelmoqda.
Izoh (0)