Turkiya prezidenti saylovi 14-may kuni bo‘lib o‘tadi. Bu haqda respublikaning amaldagi rahbari Rajab Toyyib Erdo‘g‘on ma’lum qildi, deb yozadi Cumhuriyet.
“Siz yoshlar bilan 14-maydagi saylovlarda birgalikda bo‘lish imkoniyatini bergani uchun Ollohga shukurlar aytishni xohlardim”, — dedi Erdo‘g‘on Bursa shahrida yoshlar bilan uchrashuv chog‘ida. Uning ta’kidlashicha, bu muddatidan avvalgi saylovlar emas, balki saylovlarning boshqa sanaga ko‘chirilishi hisoblanadi. Erdo‘g‘on 10-mart kuni yangi sanani belgilaydi.
Dastlab mamlakatda umumiy saylovlar — bir vaqtning o‘zida ham prezident, ham parlament saylovlarini o‘tkazish 18-iyunga rejalashtirilgan edi. Adolat va taraqqiyot partiyasi rahbari Erdo‘g‘on ularni ertaroq muddatga ko‘chirishi haqida kuzatuvchilar ko‘p bora aytib o‘tgan. Sabah gazetasi bu haqda o‘tgan yil dekabrida o‘z manbalariga tayanib yozgandi. Erdo‘g‘on ham bunday ssenariy ehtimoldan xoli emasligini aytgan.
18-yanvar kuni o‘z partiyadoshlari qarshisida nutq so‘zlayotib, Turkiya prezidenti 1950-yil 14-may kunini xotirlagandi — o‘shanda mamlakatda saylovlar bo‘lib o‘tgan va Otaturk muxolifatchilari g‘olib chiqqan edi. “Oradan 73 yil o‘tib, xuddi shu kuni xalqimiz ‘oltilik bloki’dagi bu qarsakboz fitnachilarga yana ‘yo‘q’ deydi”, — dedi Erdo‘g‘on muxolifatchi partiyalar alyansini nazarda tutib.
2014-yildan buyon prezident lavozimini egallab kelayotgan Erdo‘g‘on (ungacha 2003-yildan hukumat rahbari lavozimida ishlagan) saylov uchastkalariga o‘z tarafdorlarini ko‘proq jalb qilish imkoniyatlarini qidirmoqda, saylov kunining o‘zgartirilishi shu bilan izohlanadi. Bundan tashqari, 14-may — “dindor turklar uchun juda muhim” sana, deb yozadi OAVlar. 1950-yildagi saylovda g‘alaba qozongach, Adnan Menderes va uning Demokratik partiyasi aholining diniy qatlami foydasiga islohotlarni amalga oshirgan edi, biroq 1961-yilgi harbiy to‘ntarishdan keyin u osib o‘ldirilgan, shundan so‘ng esa Turkiyada o‘nglar uchun muqaddas shaxsga aylangan.
Rajab Toyyib Erdo‘g‘on 2014-yilda birinchi to‘g‘ridan to‘g‘ri prezidentlik saylovida g‘olib bo‘lganidan buyon ushbu lavozimni egallab keladi. 2017-yilda Turkiyada konstitutsiyaga tuzatishlar kiritish haqida referendum bo‘lib o‘tdi, ular orasida boshqaruvning prezidentlik shakliga o‘tish taklifi ham bo‘lgan. Tuzatishlar 2019-yilda kuchga kirishi kerak edi, biroq 2018-yilda Erdo‘g‘on muddatidan oldingi prezident va parlament saylovlarini belgiladi, ularda o‘zi va “Xalq alyansi” g‘alaba qozondi.
Izoh (0)