Shvetsiya Gruziya hukumati bilan barcha to‘g‘ridan to‘g‘ri hamkorlikni to‘xtatmoqda. Bu haqda Shvetsiya tashqi savdo va rivojlanish vaziri Bendjamin Dausa xabar berdi.
Avvalroq Yevropa ittifoqining Yevropa ishlari bo‘yicha vazirlari Gruziyadagi saylovlar vaqtida qonunbuzarliklar tufayli yuzaga kelgan vaziyatdan xavotirda ekanini bildirgan edi.
“Biz soliq organlari o‘rtasidagi hamkorlik haqida ham gapiryapmiz, biz buni hozirgi sharoitda nomaqbul deb hisoblaymiz”, dedi Dausa Dagens Nyheter nashriga.
Vazirning aniqlik kiritishicha, Shvetsiya rasmiylari agar mamlakat “Yevropa ittifoqiga yana yaqinlashsa” Gruziya bilan hamkorlikni tiklashi mumkin.
Nashr, shuningdek, 2024-yil oxirigacha Shvetsiya Gruziyadagi fuqarolik jamiyatini qo‘llab-quvvatlash uchun 25 million kron (2,4 million dollar) ajratayotganini ma’lum qilgan.
26-oktyabr kuni Gruziyada parlament saylovlari bo‘lib o‘tdi. Markaziy saylov komissiyasiga ko‘ra, Rossiya bilan munosabatlarni saqlab qolish va Rossiyaga nisbatan sanksiyalarga qarshi turish tarafdori bo‘lgan hukmron “Gruziya orzusi” 53,93 foiz ovoz to‘plagan. To‘rt muxolifat partiyasi ham parlamentga kirib, jami 37,78 foiz ovoz olgan.
Muxolifat vakillari allaqachon MSK ma’lumotlarini tan olmasligini aytishgan. Konstitutsiya prezidentning partiyasiz bo‘lishini talab qilganiga qaramay, yevropaparast muxolifatga yordam berayotgan Gruziya prezidenti Salome Zurabishvili saylov natijalari bo‘yicha norozilik namoyishlariga chaqirgan. Muxolifatning mitingi 28-oktyabr kuni kechqurun mamlakat parlamenti oldida bo‘lib o‘tgan.
Izoh (0)