Yevropa xavfsizlik va hamkorlik tashkiloti (YeXHT) maxsus koordinatori, tashkilotning O‘zbekistonda prezidentlik saylovlarini kuzatuvchi qisqa muddatli missiyasi rahbari, avstriyalik deputat Reynxold Lopatka jurnalistlar bilan suhbatda saylov kampaniyasi va prezident saylovi haqidagi fikrlari bilan bo‘lishdi, deb xabar bermoqda “Gazeta.uz”.
Saylov kuzatuvchisi sifatida Toshkentdagi qator saylov uchastkalariga tashrif buyurgan Reynxold Lopatkaninig ta’kidlashicha, prezident saylovi u kuzatuvchi bo‘lgan 2019-yil dekabrdagi parlament saylovlari kabi, yaxshi darajada tashkillashtirilgan. Bundan tashqari, Reynxold Lopatka so‘nggi yillarda saylovlar sohasida mamlakatda rivojlanish bo‘lganini qayd etdi. “Sizlar to‘g‘ri yo‘ldasizlar, lekin bu oxirgi qadam emas, navbatdagi qadamlarni qo‘yish kerak”, — deb ta’kidlagan u.
Shu bilan birga, YeXHT vakili saylovdagi ayrim kamchiliklarni ham qayd etgan. “[Saylov uchastkalaridan birida] bir kishining, nega bilmadim, saylov qutisiga ikkita byulleten tashlaganini ko‘rdim”, — degan u.
Reynxold Lopatkaning fikricha, saylov kampaniyalari davomida prezidentlikka nomzodlarning aytgan gaplarida katta farq kuzatilmagan.
“Avstriyada nomzodlar o‘rtasida raqobat va kurash ancha kuchliroq. Hatto siz saylangan prezident bo‘lsangiz ham, boshqa nomzodlar kampaniya davomida siz haqingizda tanqidiy fikrlar bildirishi mumkin. Bu mening yurtim va O‘zbekiston o‘rtasidagi juda katta farq”, — deydi Reynxold Lopatka.
Nomzodlarning saylov kampaniyasini yoritish borasida esa Reynxold Lopatka “albatta, u teng bo‘lmadi, lekin amaldagi prezidentni boshqa nomzodlarga qaraganda ko‘proq yoritish g‘arb mamlakatlarida ham kuzatiladi”, deya fikr bildirgan.
Ma’muriy resurslarning sarflanishi borasida esa u shunday degan: “Yevropaning ayrim davlatlarida talablar qat’iy va undan foydalanishning iloji yo‘q. Aniq talablar bo‘lishi, qonunchilik bilan belgilanishi doim muhim”.
Reynxold Lopatka muhokama qilinishi lozim bo‘lgan masalalar qatoridan nomzodlarni faqat siyosiy partiyalardan ko‘rsatish shartini ham qayd etib o‘tgan. “Ayrim partiyalar ro‘yxatga olinmagan”, — deya qo‘shimcha qilgan u.
Eslatib o‘tamiz, O‘zbekiston prezidenti saylovida ovoz berish jarayoni 24-oktabr kuni soat 20:00 ga qadar davom etadi. Toshkent vaqti bilan soat 17:00 holatiga ko‘ra ro‘yxatga olingan jami saylovchilar (19 859 127 kishi)ning 71,6 foizi yoki 14 258 780 kishi ovoz berib bo‘ldi.
Izoh (0)