Rossiyada navbatdagi prezidentlik saylovi 2024-yil 17-martda bo‘lib o‘tadi. Federatsiya Kengashi tegishli qarorni qabul qildi, deb xabar bermoqda “Interfaks”.
Parlament yuqori palatasi spikeri Valentina Matvienko Federatsiya Kengashining qarorini sharhlar ekan, bu “mohiyatan saylov kompaniyasi boshlanganini anglatadi”, deb aytdi.
O‘z navbatida, Rossiya Markaziy saylov komissiyasi raisi Ella Pamfilova Rossiyaning zamonaviy tarixida ilk bor prezidentlik saylovlari “bu qadar toksik geosiyosiy muhitda o‘tkazilishini” ta’kidladi. Uning so‘zlariga ko‘ra, 8-dekabr kuni Markaziy saylov komissiyasi prezident saylovida ovoz berishni uch kun — 15, 16 va 17-mart kunlari o‘tkazish to‘g‘risidagi qaror loyihasini ko‘rib chiqadi.
Ukrainaning Rossiyaga qo‘shib olingan viloyatlarida saylov o‘tkazish to‘g‘risidagi qaror 12-dekabrga qadar qabul qilinadi, dedi Markaziy saylov komissiyasi rahbari. Shu bilan birga, uning so‘zlariga ko‘ra, 2024-yilgi prezidentlik saylovlarida chet eldagi saylovchilar uchun masofadan turib ovoz berish ko‘zda tutilmagan.
Vladimir Putin 2024-yilgi saylovlarda ishtirok etishini hali rasman e’lon qilmagan.
Shu bilan birga, OAV Kreml allaqachon Putin ishtirokidagi saylovlarga tayyorgarlik ko‘rayotgani haqida ma’lum qilgan. Rossiya prezidenti ma’muriyati uning saylovdagi raqiblari Rossiya Kommunistik partiyasi, Liberal-demokratik partiyasi va “Yangi xalq” partiyasidan kamida 50 yoshli siyosatchilar bo‘lishini kutmoqda. Putin 80 foizdan ko‘proq ovoz olishi taxmin qilingan.
Izoh (0)