O‘zbekistonda 2025—2026-yillarda sun’iy intellekt texnologiyalari sohasida ustuvor loyihalarni amalga oshirish chora-tadbirlari to‘g‘risidagi hukumat qarori qabul qilindi. Hujjat bilan shu yillar davomida Raqamli texnologiyalar vazirligi tizimidagi hamda ularning ishtirokidagi tashkilotlar tomonidan sun’iy intellekt texnologiyalarini joriy etish bo‘yicha ustuvor loyihalar ro‘yxati tasdiqlandi.
Unga ko‘ra, sun’iy intellekt yordamida dori vositalariga bozor ehtiyojlarini tahlil va prognoz qilish uchun dasturiy mahsulot ishlab chiqiladi. 2025-yil oktyabrgacha tizimni ishlab chiqish va joriy etishda xorijiy tajriba o‘rganilishi hamda loyiha texnik hujjatlari ishlab chiqilishi lozim. 2027-yil fevralidan tizim sinov tariqasida “Farmatsevtik mahsulotlar xavfsizligi markazi” DMda ishga tushiriladi. O‘sha yilning iyulidan esa tizimni to‘liq ishga tushirish rejalashtirilgan.
Shuningdek, klinik qarorlar qabul qilishni avtomatlashtirish va qo‘lllab-quvvatlash hamda tibbiy yordam sifatini oshirishga mo‘ljallangan sun’iy intellektga asoslangan raqamli tibbiy yordamchi dasturiy ta’minoti ishlab chiqiladi. 2025-yil sentyabrigacha loyiha texnik hujjatlari ishlab chiqiladi, 2026-yil oktyabridan esa tizim sinov tariqasida Toshkentning Olmazor tumanidagi ko‘p tarmoqli markaziy poliklinikasi hamda “Shox saroy” xususiy klinikasida ishga tushiriladi. O‘sha yilning dekabrida esa tizimni to‘liq ishga tushirish ko‘zda tutilgan.
Bundan tashqari, ko‘krak qafasidagi tugunlar, o‘smalar, yallig‘lanish jarayonlari va boshqa patalogik o‘zgarishlarni ehtimoliy aniqlash maqsadida sun’iy intellekt yordamida kompyuter tomografiyasi va rentgen tasvirlarini tahlil qiladigan dasturiy mahsulot ishlab chiqilishi rejalashtirilgan.
Sog‘liqni saqlash va farmatsevtika sanoati sohalaridan tashqari, transport, logistika, va jamoat xavfsizligini ta’minlash sohalarida, ekologiya, sanoat, xizmat ko‘rsatish va boshqa sohalarda sun’iy intellekt texnologiyalarini joriy etish nazarda tutilmoqda.
O‘zbekistonda “Sun’iy intellekt texnologiyalarini 2030-yilga qadar rivojlantirish strategiyasini tasdiqlash to‘g‘risida”gi prezident qarori qabul qilingandi. Unga ko‘ra, sun’iy intellekt asosida yaratilgan dasturiy mahsulotlar va ko‘rsatiladigan xizmatlar hajmini 1,5 milliard AQSH dollariga yetkazish rejalashtirilgan. Sun’iy intellektga tayyorlik indeksida (Government AI Readiness Index) O‘zbekistonni birinchi 50 ta o‘rindagi davlatlar qatoriga kirishiga erishish maqsad qilingan.
Izoh (0)