Hikmatilla Ubaydullayev 2-iyuldan boshlab Markaziy Osiyo sun’iy intellekt assotsiatsiyasi (AICA) ijrochi direktori vazifasini bajaruvchi etib tayinlandi. Tegishli qaror AICA raisi Vladimir Norov tomonidan qabul qilindi.
Hikmatilla Ubaydullayev strategik kommunikatsiyalar, raqamli texnologiyalar va sun’iy intellekt sohasida mutaxassis hisoblanadi. U generativ sun’iy intellekt, ta’lim va ma’lumotlarni avtomatlashtirish hamda tahlil qilish sohasidagi amaliy yechimlar kesishmasida loyihalarni amalga oshiruvchi xususiy laboratoriya — AIM Lab’ning asoschisi va rahbaridir.
Ilgari u Prezident administratsiyasi tuzilmalarida rahbarlik lavozimlarini egallagan. Xususan, Prezident administratsiyasi huzuridagi Axborot va ommaviy kommunikatsiyalar agentligi matbuot xizmatiga rahbarlik qilgan, shuningdek, Milliy ommaviy axborot vositalarini qo‘llab-quvvatlash va rivojlantirish jamoat fondi matbuot kotibi lavozimida ishlagan. 2022—2023-yillarda Prezident administratsiyasida AKT va jamoat loyihalari bo‘yicha yetakchi maslahatchi vazifasini bajargan.
AICA ijrochi direktori vazifasini bajaruvchi Hikmatilla Ubaydullayev o‘z sharhida quyidagilarni ta’kidladi:
“Bizning asosiy maqsadimiz — Markaziy Osiyoda sun’iy intellekt jamiyatga xizmat qiladigan, islohotlarni qo‘llab-quvvatlaydigan va sifatli rivojlanishning harakatlantiruvchi kuchiga aylanadigan barqaror sun’iy intellekt ekotizimini shakllantirishdir.
E’tiborimiz markazida kadrlar tayyorlash masalasi turibdi. Biz maktab o‘quvchilari, talabalar va yosh mutaxassislarni o‘qitishga mo‘ljallangan “AI Maktab” milliy dasturini ishga tushirmoqdamiz. U raqamli savodxonlik, mashinali o‘rganish asoslari, neyron tarmoqlar bilan ishlash, sun’iy intellekt etikasi va real vazifalarni hal qilishda texnologiyalarni qo‘llash ko‘nikmalarini o‘z ichiga oladi. Biz mintaqalardagi yoshlar global jarayonlardan chetda qolmasligini va sun’iy intellektni rivojlantirishda nafaqat foydalanuvchilar, balki ishlab chiquvchilar, tadqiqotchilar va tadbirkorlar sifatida ham ishtirok etishlarini istaymiz.
Ikkinchi ustuvor yo‘nalishimiz — ta’lim, sog‘liqni saqlash, davlat xizmatlari, sud tizimi va ekologiya kabi asosiy sohalarga sun’iy intellekt yechimlarini joriy etishdir. Biz allaqachon bir qator idoralar bilan hamkorlik qilib, pilot loyihalarni amalga oshirmoqdamiz. Vazifamiz — sun’iy intellektni amaliy muammolarni hal qilish, xizmatlar sifatini yaxshilash va shaffoflikni oshirish uchun qulay vositaga aylantirish.
Yetakchi universitet va institutlar bilan mutaxassislar tayyorlash va Yevropaning sun’iy intellekt markazlarida o‘quv dasturlarini tashkil etish bo‘yicha memorandumlar imzoladik. Shuningdek, hamkorlikni yo‘lga qo‘yish, tajribani jalb qilish va eng yaxshi amaliyotlarni mintaqaviy kontekstga moslashtirish uchun OpenAI, Meta, Hugging Face kabi asosiy global o‘yinchilar bilan muloqot olib bormoqdamiz.
AICA hamjamiyat uchun ochiq platformaga aylanadi: biz AI elchilari, AI ayol liderlari, ML hamjamiyatlarini jamlayapmiz, startaplar uchun xakatonlar, forumlar, seminarlar va taqdimot sessiyalarini o‘tkazamiz. Bu shunchaki uyushma emas, balki g‘oyalar, tajribalar, hamkorlik va o‘sish markazi bo‘ladi.
Mintaqadagi sun’iy intellektning kelajagi nafaqat texnologik, balki insonparvar bo‘lishi kerakligiga ishonamiz. Bizning vazifamiz sun’iy intellektning axloqiy, adolatli va jamiyat uchun maksimal foyda keltiradigan tarzda rivojlanishini ta’minlashdir’.
AICA raisi Vladimir Norov davlat arbobi, O‘zbekistonning sobiq tashqi ishlar vaziri, Shanxay hamkorlik tashkiloti sobiq bosh kotibi va O‘zbekiston Prezidentining maslahatchisi hisoblanadi.
Markaziy Osiyo sun’iy intellekt assotsiatsiyasi (AICA) mintaqaning 12 ta ustuvor sektorida sun’iy intellektni joriy etish bo‘yicha sa’y-harakatlarni muvofiqlashtirish, ta’lim va tadqiqot tashabbuslarini qo‘llab-quvvatlash, shuningdek, raqamli etika tamoyillarini ilgari surish maqsadida tashkil etilgan xalqaro nodavlat notijorat tashkilotdir.
Izoh (0)