AQSHda o‘qishni orzu qilayotgan dunyoning minglab talabalari ommaviy ravishda o‘z ijtimoiy tarmoqlarini “tozalamoqda”. Mashhurlar va siyosatchilarga obunani bekor qilmoqda, siyosiy deb talqin qilinishi mumkin bo‘lgan postlar va hatto layklar ham o‘chirilmoqda. Bu haqda Washington Post (WP) gazetasi xabar bermoqda.
Ma’lum qilinishicha, bunga Donald Trampning farmoyishi bilan viza tekshiruvining kuchaytirilishi sabab bo‘lgan. AQSH Davlat departamenti iyun oyida “kengaytirilgan skrining” joriy etib, ariza beruvchilardan akkauntlarni ochiq qilishni va viza ofitserlariga fotosuratlardan tortib memlar va obunalargacha bo‘lgan barcha onlayn faoliyatni tekshirishga ruxsat berishni talab qilgan.
Gazeta tanishgan Davlat departamentining ichki hujjatida aytilishicha, ofitserlar “Amerika fuqarolari, madaniyati, institutlari va asosiy tamoyillariga dushmanlik” alomatlarini aniqlashlari kerak. Bundan tashqari, Isroilga qarshi har qanday tanqid Amerika manfaatlariga zid deb qabul qilinishi mumkin.
Ta’kidlashicha, bundan talabalar vahimaga tushgan.
“Men hamma narsadan — Bayden, Kamala Xarris, Obama va demokrat kongressmenlardan obunani bekor qildim”, deydi familiyasini aytmaslikni so‘ragan Madlen.
Boshqalar Xarris postlaridan layklarni olib tashlagan, Falastin bayrog‘i yoki tarvuz — Falastinni qo‘llab-quvvatlash ramzi bo‘lgan foydalanuvchilardan obunani bekor qilishgan.
Qayd etilishicha, hatto neytral harakatlar ham endi shubha ostiga olinmoqda. Bir talaba “devorga zarba bermoqchiman” memini olib tashlagan, chunki buni tajovuzkorlik deb hisoblashlaridan qo‘rqqan. Boshqa biri Afg‘onistondagi xayriya haqidagi videoni ko‘rishdan bosh tortgan — “layk bosgan, keyin olib tashlagan”.
Ba’zilar pulli xizmatlarga murojaat qilishmoqda. Phyllo va Redact.dev kabi startaplar ijtimoiy tarmoqlarda “xavfni skanerlash” uchun sun’iy intellekt vositalarini reklama qilmoqda. Shiorlardan biri “Eski post AQSHga bo‘lgan rejalaringni barbod qilishiga yo‘l qo‘yma”.
Shu bilan birga, visa berish yuzasida rad etishlar soni ortib bormoqda. Avstriyalik talabaga ijtimoiy tarmoqlar yo‘qligi sababli viza berish rad etilgan. Chunki bu shubhali deb topilgan. Advokatlarning ta’kidlashicha, qarorlar tushuntirilmayapti, apellyatsiya berish imkoni yo‘q. Viza berilmagan bo‘lsa, bu qarorga e’tiroz bildirishning iloji yo‘q. Shu bilan birga, viza bermaslik talabaning butun viza tarixiga ta’sir qilishi mumkin. Unga keyingi yil ham hujjatlar berilmasligi ehtimoli yuqori.
Qoidalarning qattiqlashtirilishi Tramp ma’muriyatining Falastinga qarshi choralari, jumladan, norozilik namoyishlarida qatnashayotgan xorijliklarga bosim o‘tkazishi bilan bog‘liq. Yangi ko‘rsatmalar faollarning AQSHda faoliyatini davom ettirish-ettirmasligini va bu “akademik maqsadlar”ga mos kelishini tekshirishni talab qiladi.
“Men siyosiy narsalarni umuman nashr etishni to‘xtatdim. Endi mening profilim shunchaki bo‘sh shablon”, deydi Madlen.
Izoh (0)