“Parazitlar” filmi bilan tanilgan Janubiy Koreyaning CJ ENM studiyasi “Cat Biggie” nomli qisqa metrajli animatsion serialni taqdim etdi. Mazkur loyiha ishlab chiqarishning barcha bosqichlarida sun’iy intellektda foydalangan ilk serial bo‘ldi.
Serial syujeti Biggi laqabli mushuk haqida bo‘lib, u kutilmaganda qush bolasi uchun otalik qilishga majbur bo‘ladi. Har biri ikki daqiqalik 30 qismdan iborat serial atigi olti kishidan iborat jamoa tomonidan besh oy ichida yaratilgan.
“Biz sun’iy intellektni kontent yaratishning barcha bosqichlarida — rejalashtirish, ishlab chiqarish, tarqatish va marketingda qo‘llayapmiz. Maqsadimiz turli janr va formatlarda sun’iy intellekt asosidagi film va seriallar ishlab chiqarishni kengaytirishdir”, dedi CJ ENM studiyasining strategiya bo‘yicha direktori Shin Ken Sup.
Ishlab chiqarishda ikkita asosiy tizim: Cinematic AI va AI Script’dan foydalaniladi. Cinematic AI tasvir, video, tovush va ovozni yagona platformaga birlashtirib, 3D qahramonlar va ularning atrofidagi makonni avtomatik tarzda modellashtiradi. AI Script esa auditoriya talablari va bozordagi talablarni tahlil qilib, eng mos janr va media formatlarni taklif qiladi.
CJ ENM o‘zini “global sun’iy intellekt studiyasi” deb ataydi. Kompaniya yaqin bir yil ichida ilg‘or texnologiyadan foydalangan holda yana ko‘plab film va seriallar ishlab chiqarishni rejalashtirmoqda.
Izoh (0)