Turkiyada milliarder Ilon Maskning xAI kompaniyasi tomonidan ishlab chiqilgan Grok sun’iy intellektli chat-botiga kirish bloklandi. Bu haqda Reuters xabar berdi.
Turkiya rasmiylarining bildirishicha, Grok turk tilida berilgan ayrim savollarga javoban prezident Rajab Toyyib Erdo‘g‘on, zamonaviy Turkiya asoschisi Mustafa Kamol Otaturk va diniy qadriyatlarni haqorat qiluvchi kontent taqdim etgan. Shu sababli Anqara bosh prokuraturasi hodisa yuzasidan rasmiy tekshiruv boshlanganini ma’lum qildi.
Bu Turkiyada sun’iy intellekt platformasiga nisbatan qo‘llangan birinchi rasmiy bloklash chorasi hisoblandi. Mavjud qonunchilikka ko‘ra, Turkiya prezidentini haqorat qilish jinoyat hisoblanadi. Buning uchun to‘rt yilgacha ozodlikdan mahrum qilish jazosi belgilangan. Shu asosda Turkiya Axborot va kommunikatsiya texnologiyalari boshqarmasi sud qaroriga tayanib, Grok’ni bloklash to‘g‘risida qaror chiqargan.
X (sobiq Twitter) platformasi ham, Ilon Maskning o‘zi ham bu holat yuzasidan hozircha izoh bermagan. Sun’iy intellektga ega chat-botlar siyosiy tarafkashlik, nafrat tili va faktik xatolar yuzasidan tanqid ostida qolmoqda.
Bunday xavotirlar OpenAI kompaniyasi 2022-yilda ChatGPT’ni ishga tushirganidan buyon mavjud. Aynan o‘shanda Grok Adolf Gitlerni maqtov bilan tilga olgan kontent e’lon qilgani uchun tanqidga uchragandi.
Izoh (0)