Pekinda robotlar ishtirok etgan birinchi futbol musobaqasi bo‘lib o‘tdi, deya xabar berdi “Pravila jizni”.
Turnir davomida gumanoid robotlar o‘zini haqiqiy sportchilar kabi tutdi: ular xotirjamlikni saqlab, maydonda faol harakat qildi va to‘p uchun kurashdi. Ayrim robotlar o‘yim davomida raqiblarini yiqitdi, boshqalari esa oyoqda turishga biroz qiynaldi. Shunga qaramay, ko‘plab “o‘yinchilar” muvozanatni saqlay olmay, maydondan zambil yordamida olib chiqib ketildi.
Garchi robotlar o‘yin davomida sekin harakatlangan bo‘lsa-da, bu kabi musobaqalar sun’iy intellekt sohasida erishilayotgan yutuqlarni yaqqol namoyish etadi. Ushbu robotlar to‘liq avtomatlashtirilgan bo‘lib, o‘yin davomida inson nazoratisiz, faqat o‘z algoritmlariga tayangan holda harakatlangan.
Mutaxassislarning ta’kidlashicha, bunday tadbirlar Xitoyning sun’iy intellektga ega robototexnika yo‘nalishidagi yetakchiligini ko‘rsatadi. Bunga davlat tomonidan ko‘rsatilayotgan qo‘llab-quvvatlash asosiy omil bo‘lmoqda. Mutaxassislar prognoziga ko‘ra, 2028-yilga kelib Xitoyning robototexnika bozori hajmi 108 milliard dollarga yetadi. 2050-yilga borib esa mamlakatda 302,3 million gumanoid robotlar faoliyat yuritishi kutilmoqda.
Xitoyda sun’iy intellektga ega robotlarni qo‘llab-quvvatlash darajasi boshqa mamlakatlarga qaraganda yuqori. Shu sababli mamlakatda bu soha tez rivojlanmoqda”, dedi Morgan Stanley tadqiqotlari bo‘yicha mutaxassis Shen Chjun.
Mazkur turnir 2025-yilda o‘tkazilishi rejalashtirilgan Jahon gumanoid robotlar o‘yinlariga tayyorgarlik bosqichidir. Yaqin kelajakda insonlar va robotlar o‘rtasida futbol o‘yinlarini tashkil etish ham rejalashtirilgan.
Izoh (0)