YouTube rahbariyati noreal videolar bilan kurashish maqsadida platformaning qoidalariga o‘zgartirish kiritadi. Bunda gap neyrotarmoqlar yordamida yaratilgan videoroliklar haqida ketmoqda. Shu tariqa videoxosting o‘z obro‘siga putur yetkazishi mumkin bo‘lgan holatlarning oldini oladi. Bunday kontentlarning mualliflari daromadini kamaytirish orqali moliyaviy xarajatlar ham qisqartiriladi.
YouTube monetizatsiya qoidalari 2025-yil 15-iyulda yangilanadi. Platformada qaysi videolar monetizatsiya qilinishi mumkinligi va qaysilari mumkin emasligi haqida batafsil ko‘rsatmalar va ta’riflar paydo bo‘ladi. Hozircha yangiliklar haqida aniq ma’lumotlar yo‘q, ammo kompaniyadagilarning aytishicha, ularning siyosati har doim original va haqiqiy kontentni yuklashni nazarda tutgan. O‘zgarishlar bu jihatni sun’iy intellekt tomonidan yaratilgan videolar uchun ham aniqlashtiradi.
YouTube mualliflari allaqachon videoxosting g‘oyasi ularning daromadini jiddiy cheklab qo‘yishidan xavotirlanib, bong ura boshladi. Shu bilan birga, platforma vakillari yangilangan qoidalar ularning daromadlariga ta’sir qilmasligi kerakligini aytib, blogerlarni tinchlantirmoqda. Bunga tahririyat va mualliflar bilan ishlash bo‘limi boshlig‘i Rene Richi quyidagicha aniqlik kiritdi: yangilik ahamiyatsiz. Bu faqat qaysi kontent “ommaviy ishlab chiqarilgan” yoki “takroriy” ekanini yaxshiroq aniqlashga yordam beradi.
Richining aytishicha, tomoshabinlar spam deb hisoblagani uchun original bo‘lmagan videolar anchadan beri monetizatsiya qilinmayapti. Shu bilan birga, u so‘nggi paytlarda sun’iy intellekt yordamida video yaratish imkon qadar osonlashgani va bunday videolar tarmoqni to‘ldirib yuborgani haqida gapirdi. Ko‘pchiligi millionlab ko‘rishlarni to‘plamoqda, ba’zilari esa Google’ning Veo 3 kabi vositasi tufayli juda haqiqatga o‘xshab ko‘rinmoqda.
Shu sababli, YouTube bo‘lajak o‘zgarishlarning ahamiyatini kamaytirmoqchi bo‘lsa-da, aslida sun’iy intellekt videolarining ko‘pligi tufayli ko‘plab mualliflar zarar ko‘radi. Biroq, bunday kontentning nazoratdan tashqari kengayishi pirovardida kompaniyaning o‘ziga obro‘ va moliyaviy jihatdan zarar yetkazishi mumkin. Shuning uchun kompaniyaning neyrokontent va uning mualliflarini tartibga solish uchun aniq qoidalarni belgilashdan boshqa chorasi yo‘q.
Izoh (0)